სამაუწყებლო კომპანია რუსთავი 2-ის ჟურნალისტი, თეონა ცხომელიძე ვარაუდობს, რომ, შესაძლოა, მისი ინფიცირების წყარო პოლიტიკოსი თაკო ჩარკვიანი იყოს, რომელიც რამდენიმე დღის წინ დღის კურიერის სტუმარი იყო.

"დღეს დამიდასტურდა კორონავირუსი, მაქვს ტემპერატურა, სხვა სიმპტომი არ მაქვს. სავარაუდოდ, ჩემი ინფიცირება მოხდა პოლიტიკოს თაკო ჩარკვიანისგან, ამას დაადგენენ უფრო ზუსტად ეპიდემიოლოგები. მქონდა, სამწუხაროდ, ბევრი კონტაქტი სამსახურში, ამ პერიოდში ყოველდღე ვმუშაობდი. ყველაზე მეტად იმ ადამიანებზე ვნერვიულობ, რომლებიც, შესაძლოა, ჩემგან დაინფიცირდნენ", — ამბობს თეონა ცხომელიძე.

რუსთავი 2-ის ჟურნალისტის კორონავირუსი დადასტურების შესახებ ინფორმაცია დღეს 11 სექტემბერს გახდა ცნობილი.

11 სექტემბრის მონაცემებით, საქართველოში კორონავირუსის 87 ახალი შემთხვევა გამოვლინდა, გამოჯანმრთელებულთა რიცხვი კი 20-თ გაიზარდა. ამის შესახებ ინფორმაცია დაავადებათა კონტროლის გვერდზე განახლდა.

ჯამში ქვეყანაში კორონავირუსის 1 917 დადასტურებული შემთხვევაა, მათ შორის გამოჯანმრთელდა — 1 354, გარდაიცვალა — 19. კარანტინის რეჟიმში — 5 882 პირი იმყოფება, სტაციონარში მეთვალყურეობის ქვეშ — 390.