დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ეკონომიკის მინისტრის, ნათია თურნავას განცხადებით, კორონავირუსის გამო დაწესებულ მკაცრ შეზღუდვებს ჩვენი ეკონომიკა მეორედ ვეღარ გაუძლებს. ამის შესახებ მან მთავრობის სხდომის დასრულების შემდეგ ისაუბრა.

"ყველაფერს ვაკეთებთ, რომ კვლავ დიდი შემზღუდავი და მკაცრი ზომები არ გახდეს საჭირო, როგორც ეს გავიარეთ. ჩვენი ეკონომიკა, რა თქმა უნდა, მეორედ ასეთ დარტყმას ვერ გაუძლებს. შესაბამისად, წერტილოვანი ღონისძიებებითა და ჩვენი სამედიცინო პერსონალის პროფესიონალიზმის წყალობით იმედი გვაქვს, რომ უმტკივნეულოდ გავივლით ამ პროცესს", — აღნიშნა თურნავამ.

კორონავირუსის შეზღუდვების ზრდის გამო მთავრობის გადაწყვეტილებით სხვადასხვა სოციალური ღონისძიების, მათ შორის ქორწილებისა და ქელეხების ჩატარება იკრძალება. ამასთან, აიკრძალება ღია ცის ქვეშ კლუბები. თეატრებისა და კინოთეატრების გახსნა კი პირველ ნოემბრამდე გადაიდო.

10 სექტემბრის მონაცემებით, საქართველოში კორონავირუსის 57 ახალი შემთხვევა გამოვლინდა, გამოჯანმრთელდა 9 პაციენტი, მონაცემები StopCov-ზე განახლდა.

ჯამში, საქართველოში კორონავირუსის დადასტურებულ შემთხვევათა რაოდენობა 1 830-მდე გაიზარდა, ამათგან 1 334 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: