ბელარუსის მოქმედმა პრეზიდენტმა, ალექსანდრე ლუკაშენკომ რუსულ მედიებთან საუბარში განაცხადა, რომ ის "ასე უბრალოდ არ წავა". TUT.BY რუს ჟურნალისტებზე დაყრდნობით ლუკაშენკოსთან საუბრის დეტალებზე წერს.

რადიოსადგურ საუბრობს მოსკოვის მთავარი რედაქტორი, რომან ბაბაიანი ლუკაშენკოს ასე ციტირებს:

"ასე უბრალოდ არ წავალ. საუკუნის მეოთხედია ბელარუსს ვაშენებ. ასე მარტივად არ დავტოვებ ამ ყველაფერს. ასევე, თუ წავალ, ჩემს მხარდამჭერებს არ გააჩერებენ. ჩვენ მზად ვართ კონსტიტუციის რეფორმისთვის, ამის შემდეგ ვადამდელ საპრეზიდენტო არჩევნებს არ გამოვრიცხავ", — განაცხადა ლუკაშენკომ.

ბაბაიანის ინფორმაციით, ლუკაშენკომ საკოორდინაციო საბჭოსთან დაკავშირებით თქვა, რომ საბჭოზე არ ილაპარაკებს, რადგან "არ იცის, ვინ არიან ეს ადამიანები". მისივე თქმით, ის რაღაცები, რასაც ისინი სთავაზობენ საზოგადოებას, ბელარუსისთვის და ბელარუსელი ხალხისთვის კატასტროფაა.

უკრაინის საზღვარზე დაკავებულ ოპოზიციონერ მარია კოლესნიკოვაზე ლუკაშენკომ აღნიშნა, რომ რეალურად, მას გაქცევა უნდოდა უკრაინაში, რადგან იქ მას და ჰყავს.

ტასის ცნობით, ლუკაშენკო ბელარუსში მიმდინარე საპროტესტო აქციების უკან გარე მიზეზებს, განსაკუთრებით კი, ამერიკის ინტერესებს ხედავს. ეს უკანასკნელი, ლუკაშენკოს აზრით, პოლონეთისა და ჩეხეთის დახმარებით მოქმედებს.

ავტომატით გამოჩენაზე ლუკაშენკომ თქვა, რომ ეს ნიშნავდა მხოლოდ ერთს, რომ ის "არსად გაქცეულა და რომ მზად არის ბოლომდე დაიცვას მისი ქვეყანა".

რუსეთთან ურთიერთობაზე კი ამბობს, რომ მზად არის რუსეთის ფედერაციასთან ინტეგრაცია გაგრძელდეს, მაგრამ, "უპირველეს ყოვლისა, აუცილებელია რეალურად ამუშავდეს სამოკავშირეო სახელმწიფოს ფარგლებში არსებული ყველა ინსტიტუტი და უკვე მოქმედი პროექტები.

ლუკაშენკო მედიის წარმომადგენლებს დღეს 8 სექტემბერს შეხვდა.

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.