დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ჯანდაცვის მინისტრის, ეკატერინე ტიკარაძის განცხადებით, ბათუმის საკონდიტრო დონას კლასტერი, სავარაუდოდ, ლიკვიდირებულია. ამის შესახებ მან მთავრობის სხდომის დასრულების შემდეგ განაცხადა.

"დონას კლასტერში ავიღეთ 600-ზე მეტი ტესტი, გამოვლენილი იქნა მხოლოდ ერთი ახალი შემთხვევა, რაც არის კეთილსაიმედო მაჩვენებელი. რაც იძლევა ვარაუდს, რომ დონას კლასტერის ლიკვიდირება მოხდა", — აღნიშნა ტიკარაძემ.

მისივე თქმით, ჩაქვის სასტუმრო ოაზისში, სადაც ექიმების კონფერენცია მიმდინარეობდა, 800-ზე მეტი ტესტი ჩატარდა. როგორც მინისტრმა აღნიშნა, პასუხების მიღების შემდეგ გაირკვევა, რა ნაბიჯების გადადგმას აპირებენ.

საკონდიტრო დონა ბათუმში პოპულარული ადგილია და მას ბევრი მომხმარებელი ჰყავს. პირველ სექტემბერს ცნობილი გახდა, რომ საკონდიტროს ერთ თანამშრომელს კორონავირუსი დაუდასტურდა. მეორე დღეს გამოვლენილი 38 ახალი შემთხვევიდან კი 22 სწორედ საკონდიტრო დონას თანამშრომელზე მოდიოდა. ამჟამად საკონდიტროს მუშაობა შეჩერებული აქვს.

3 სექტემბრის მონაცემებით, საქართველოში კორონავირუსის 20 ახალი შემთხვევა გამოვლინდა, გამოჯანმრთელებულთა რიცხვი კი 9-ით გაიზარდა. მონაცემები StopCov-ზე განახლდა.

ჯამში, საქართველოში კორონავირუსის დადასტურებულ შემთხვევათა რაოდენობა 1 568-მდე გაიზარდა, გამოჯანმრთელებულია 1 279 ადამიანი, გარდაცვლილი კი — 19. კარანტინის რეჟიმში რჩება 6 185 პირი, სტაციონარში მეთვალყურეობის ქვეშ კი 239 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: