ტელეკომპანია "ფორმულას" ჟურნალისტი ვახო სანაია წერს, რომ შსს მას Facebook-ზე გამოქვეყნებული ორი სტატუსისა და ვიდეოს გამო უჩივის. მისი თქმით, პირველი სტატუსი 22 ივლისს, დაკავებამდე რამდენიმე წუთით ადრე გამოაქვეყნა, მეორე — ციხიდან გამოსვლიდან რამდენიმე წუთში, მესამე შემთხვევაში საუბარია ვიდეოზე, რომელიც სერიალ "ჩემი ცოლის დაქალებიდან" უცენზურო ფრაგმენტს შეიცავს.

"შსს მიჩივის ფეისბუქზე დაწერილი ორი სტატუსისა და ერთი ვიდეოს გამო.

პირველი სტატუსი 22 ივლისსაა დადებული დაჭერამდე რამდენიმე წუთით ადრე;

მეორე სტატუსი დაწერილია ციხიდან გამოსვლიდან რამდენიმე წუთის შემდეგ;

მესამე — ვიდეო მეყლენბურგობაზე. "ჩემი ცოლის დაქალებიდან" ეგონა გუნავას ფრაგმენტი "შენ შეგ*ა, შვილო, ეშმაკმა", — წერს სანაია.

შეგახსენებთ, რომ 22 ივლისს ვახო სანაიამ სოციალურ ქსელში დაწერა: "14 დღე *ლეები არ დაუძახოთ შალვას და ვახოს. რომ გამოვალ, მე მივხედავ მაგ ამბავს". მეორე ეპიზოდშიც პარლამენტის თავმჯდომარე შალვა პაპუაშვილი და ოცნების დეპუტატი ლადო ბოჟაძე ფიგურირებენ. ის შალვა პაპუაშვილს და ლადო ბოჟაძეს მიმართავს, გაბედონ დაწერა, რომ "*ლეებს ნურავინ დაუძახებთ".

რაც შეეხება ვიდეოს, აქ სანაია პაპუაშვილის მიერ რუსთაველის პროტესტის მონაწილეებზე სოციალურ ქსელში დაწერილ სტატუსს ეხმაურება, სადაც ის მათ "ფსევდორელიგიური სექტის" წევრებად მოიხსენიებს. ჟურნალისტი ვიდეოს ასრულებს ნაწყვეტით სერიალ "ჩემი ცოლის დაქალებიდან", რომელშიც ერთ-ერთი გმირი ამბობს: "შენ შეგ*ა შვილო ეშმაკმა".

შეგახსენებთ, რომ 22 ივლისს ტელეკომპანია "ფორმულას" ჟურნალისტი ვახო სანაია საკუთარ სახლთან დააკავეს. ჟურნალისტს სოციალურ ქსელში დაწერილი პოსტის გამო 14-დღიანი პატიმრობა შეუფარდეს. გადაწყვეტილება მოსამართლე ზვიად ცეკვავამ მიიღო. მანამდე, 10 ივლისს, იმავე ტიპის Facebook-პოსტების გამო სანაია 6 000 ლარით დააჯარიმეს. "რადიო თავისუფლების" მიხედვით, სანაია პირველი ადამიანი იყო, ვისაც სოციალური ქსელის პოსტის გამო პატიმრობა შეუფარდეს.

ჟურნალისტი ვახო სანაია საკუთარ სახლთან დააკავეს | ვიდეო