მმართველი გუნდის დეპუტატი რატი იოანთამიშვილი აცხადებს, რომ არავის აქვს უფლება, საარჩევნო რეკვიზიტად გამოიყენოს და დაქუცმაცებულად წარმოაჩინოს რუკა, რომელიც "ორგანულია და განუყოფელია". მისი თქმით, საქართველოს რუკას ისეთივე პატივისცემით უნდა მოეკიდოს ყველა, როგორც ეროვნულ დროშას.

"ჩემთვის ერთ-ერთი ყველაზე მძიმე სანახავი იყო, რუკა, რომელზეც გაწითლებული იყო საქართველოს განუყოფელი ტერიტორიები. ეს იყო შემაძრწუნებელი. დავეთანხმები მდიანრაძეს, რომელმაც თქვა, რომ თავიდან "ფეიქი" ეგონა. მეც თავიდან ყალბი და სიცრუე მეგონა. ვერც წარმოვიდგენდი, რომ ესეთი ატრიბუტიკის გამოყენებას ვინმე გაბედავდა, მითუმეტეს, საარჩევნო კამპანიაში", — განაცხადა მან პარლამენტში პატრიოტთა ალიანსზე საუბრისას.

იონათამიშვილის თქმით, ამ საკითხზე პოლიტიკური პასუხისმგებლობა დადგება და პასუხი იქნება მოახლოებულ არჩევნებში.

ღია პრორუსულმა პარტიამ, პატრიოტთა ალიანსმა გააკრა საარჩევნო ბანერები, რომლებზეც აჭარის რეგიონი გამოყოფილია, როგორც ოკუპირებული ტერიტორია, აფხაზეთთან და სამხრეთ ოსეთთან ერთად. აღნიშნულს სოციალურ ქსელში კრიტიკა მოჰყვა, პატრიოტთა ალიანსს შუღლის გაღვივებაში ადანაშაულებენ. პარტიაში კი ამაში პრობლემას ვერ ხედავენ. მეტიც, პარტიის ლიდერს, ირმა ინაშვილს ჰგონია, რომ ეს "აჭარისა და ქვეყნის ერთიანობის დაცვისკენ" მიმართული ქმედებაა.

აღნიშნული ბანერებიდან ერთ-ერთი ლელოს წევრმა ირაკლი კუპრაძემ ჩამოხსნა, დანარჩენები კი ბათუმის მუნიციპალურმა ინსპექციამ.

მოგვიანებით ალიანსის ლიდერმა, ირმა ინაშვილმა დაიწყო იმის მტკიცება, რომ მათი ბანერი "არასწორად შეფერადებულ მდგომარეობაში" გიგა ბოკერიას და მიხეილ სააკაშვილის დავალებით, მის პარტიაში მყოფმა, მოსყიდულმა პირებმა გააკრეს. ინაშვილი ამტკიცებს, რომ მათ ბანერზე აჭარა არა ოკუპირებული რეგიონების ფერებში, არამედ ყვითლად იყო გამოყოფილი და SOS ეწერა.

ამავე დღეებში პატრიოტთა ალიანსი ანტიეროვნულ ქმედებებში დაადანაშაულეს, როცა ისინი ოკუპირებულ რეგიონში ჩავიდნენ დე ფაქტო პრეზიდენტის ყოფილი თანაშემწის დახმარებით. გარდა ამისა, რუსულმა საგამოძიებო პორტალმა გაავრცელა ინფორმაცია იმის შესახებ, რომ პარტია წინასაარჩევნოდ კრემლიდან ფინანსდება.