ევროპული საქართველოს საარჩევნო შტაბის ხელმძღვანელი სერგი კაპანაძე პატრიოტთა ალიანსის მიერ განთავსებულ ბანერს და ქართული ოცნების პოლიტიკას ეხმიანება.

სერგი კაპანაძის თქმით, ქართული ოცნება და პატრიოტთა ალიანსი, ყოველთვის თანამშრომლობდნენ ერთმანეთთან და ეს პარტია 2016 წელს სწორედ ქართულმა ოცნებამ შეიყვანა პარლამენტში. სერგი კაპანაძემ აღნიშნა, რომ მისთვის ამ ორ პარტიას შორის განსხვავება არ არის.

"პატრიოტთა ალიანსი არის ჩვეულებრივი პრორუსული პარტია, რომელიც არის ხელისუფლების სატელიტი. არ დაგვავიწყდეს, რომ პატრიოტთა ალიანსი პარლამენტში მოახვედრა ქართულმა ოცნებამ, ყველა ეტაპზე უჭერდა მხარს, ბოლომდე სრულიად, მათ შორის პატრიოტთა ალიანსი უჭერდა მხარს მათ საპრეზიდენტო კანდიდატს 2018 წელს, ამიტომ ესენი არიან ერთი და იგივე პოლიტიკური ძალა. უბრალოდ, უფრო აგრესიულად გამოხატული პრორუსული პოლიტიკა აქვს პატრიოტთა ალიანს, ამიტომ ამ ორ ძალას შორის, ქართულ ოცნებასა და პატრიოტთა ალიანს შორის, არანაირი განსხვავება არ არის. ის ინფორმაცია, რომელიც ჩვენ გავავრცელეთ და რომელიც გავრცელდა ბოლო დღეებში, რომ ისინი პირდაპირ დაფინანსებას იღებენ რუსეთისაგან, სწორედ ეს ინფორმაცია არის საფუძველი და არამარტო ბანერი, რომ ეს ძალა იყოს ბოლომდე იზოლირებული პოლიტიკურად და მათ შორის იყოს მოხსნილი არჩევნებიდან. ამ ჩვენს მოთხოვნაზე, რომელიც ელენე ხოშტარიამ გააკეთა, არანაირი პასუხი ჯერ არ გვაქვს. ხელისუფლებას აქვს ყველანაირი საფუძველი, რომ, უბრალოდ, გამოძიება დაიწყოს იმ თემაზე, თუ საიდან მოდის ამ პარტიის ფინანსები და როგორი კავშირებია მასა და რუსეთს შორის", — განაცხადა სერგი კაპანაძემ.