ევროპული საქართველოს ლიდერი, გიგა ბოკერია აცხადებს, რომ საქართველოს მთავრობის პოზიცია ბელარუსთან დაკავშირებით ძალიან ჰგავს პუტინისა და სხვა ავტორიტარული რეჟიმების პოზიციას.

"ამ ვითარებაში ერთადერთი ვინც ძირითადად დუმს ან ირიბად ლუკაშენკოს მხარდამჭერ განცხადებებს აკეთებს, საქართველოს მთავრობა და ივანიშვილის გუნდია. მათ დიპლომატიურ ენაზეც კი შეშფოთება არ გამოუხატავთ, არ მოუწოდებიათ პატიმრების გათავისუფლებისა და ძალადობის შეწყვეტისკენ. ეს ძალიან ჰგავს პუტინისა და სხვა ავტორიტარული რეჟიმების პოზიციას. ეს მსგავსება კი საქართველოს დისტანცირებას ახდენს თავისუფალი სამყაროსგან. ეს მორალურად სამარცხვინო და პრაგმატულად საზიანო პოზიციაა საქართველოს ინტერესებისთვის", — წერს ბოკერია.

ბოკერია მიიჩნევს, რომ დგება მომენტი, როცა პოზიციის არდაკავება, როგორც მორალურად, ისე პრაგმატულად, ძალიან საზიანოა ქვეყნისთვის.

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ. ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 4 ადამიანი.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.