ლიეტუვის საგარეო საქმეთა მინისტრი, ლინას ლინკევიჩუსი არ გამორიცხავს, რომ რუსეთმა ბელარუსში სამხედრო ინტერვენცია განახორციელოს. ამის შესახებ მან ევროკავშირის წევრი ქვეყნების საგარეო საქმეთა მინისტრების არაფორმალურ შეხვედრაზე განაცხადა.

მისივე თქმით, აუცილებელია რუსეთს მოუწოდონ არ შეიჭრას ბელარუსში, რისი სერიოზული საფრთხეც არსებობს, რადგან რუსეთის მთავრობას მზადყოფნაში ჰყავს სარეზერვო სამხედრო ძალები.

"ვერ გამოვრიცხავთ, რომ ეს ინტერვენცია შეფუთული იყოს სახელშეკრულებო ვალდებულებებით, მაგრამ ჩვენ ვხედავთ, რომ ამისთვის არანაირი სამართლებრივი წინაპირობა არ არსებობს", — განაცხადა მან.

მისივე თქმით, ევროკავშირმა უნდა დააჩქაროს ქმედება და არ უნდა შემოიფარგლოს მხოლოდ განცხადებებითა და შეფასებებით. ლინკევიჩუსს აუციელებლად მიაჩნია ლუკაშენკოსთვის მკაფიო სიგნალების გაგზავნა.

რუსეთის პრეზიდენტის ვლადიმერ პუტინის თქმით, ალექსანდრ ლუკაშენკოს თხოვნით, ბელარუსისთვის სპეციალური რეზერვი შექმნა.

"ალექსანდრე ლუკაშენკომ მთხოვა, სამართალდამცავი ორგანოების თანამშრომლებისგან გარკვეული რეზერვი შემექმნა. და მე ეს გავაკეთე. მაგრამ ჩვენ ასევე შევთანხმდით, რომ ის მას არ გამოიყენებს, სანამ სიტუაცია კონტროლს ექვემდებარება", — განაცხადა მან.

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.