ირანის პრეზიდენტის ბრძანებით, 2026 წლის 30 სექტემბრიდან, ძვირადღირებული ავტომობილების იმპორტი აიკრძალება. ინფორმაციას ირანის საელჩო საქართველოში ავრცელებს.

არსებული ინფორმაციით, აღნიშნული გადაწყვეტილება ქვეყანაში არსებული მძიმე ეკონომიკური კრიზისის ფონზე იქნა მიღებული, რაც რიგითი ირანელების უკმაყოფილებას იწვევს ავტომობილებზე ფასების გამო.

მიუხედავად რთული ეკონომიკური ვითარებისა, ირანის მსხვილი ქალაქების მცხოვრებლები აღნიშნავენ, რომ მას შემდეგ, რაც აშშ-ისა და ისრაელის ძალებმა ირანის წინააღმდეგ ომი დაიწყეს, შეძლებულ უბნებში ძვირადღირებული ავტომობილების რაოდენობა შესამჩნევად გაიზარდა.

ზოგიერთი შეძლებული ირანელი ძვირადღირებულ ავტომობილებს ინვესტიციად განიხილავს, რადგან მეორადი მანქანების ფასები, როგორც წესი, შედარებით სტაბილური რჩება.

ირანში მანქანები ძვირია. თუნდაც პატარა ზომის და საბაზისო მოდელების ღირებულება 11 000 დოლარს აჭარბებს, რაც ბევრი ირანელისთვის მიუწვდომელია, რადგან მათი საშუალო ყოველვთიური ხელფასი მხოლოდ რამდენიმე ასეულ დოლარს შეადგენს.

ამის საპირისპიროდ, ნავთობით მდიდარ ქვეყანაში საწვავი ძალიან იაფია და ერთ ლიტრზე მხოლოდ რამდენიმე ცენტს შეადგენს.

ინფორმაციისთვის, საქართველომ მიმდინარე წლის 8 თვეში ირანში 129.2 მლნ აშშ დოლარის 7,360 ავტომობილი გაყიდა. გამოდის, რომ ერთეულის ფასი საშუალოდ 17,560 დოლარია.