აშშ-ის მთავრობამ სამშაბათს ირანისთვის იარაღისა და მისი კომპონენტების შესყიდვაში დახმარებისთვის 13 ფიზიკურ პირსა და ორგანიზაციას ახალი სანქციები დაუწესა. მათ შორის არიან პირები და კომპანიები რუსეთში, ჩინეთში, ჰონგ-კონგსა და პაკისტანში.

სანქციები, რომლებიც აშშ-ის სახაზინო და სახელმწიფო დეპარტამენტებმა გამოაცხადეს, ტრამპის ადმინისტრაციის მცდელობის ნაწილია, ირანი ეკონომიკურად იზოლირებული გახადოს და აიძულოს, მოლაპარაკებები დაიწყოს ომის დასრულებაზე, რომელიც 28 თებერვალს ირანზე აშშ-ისა და ისრაელის დარტყმით დაიწყო.

"სახაზინო დეპარტამენტი არ შეეგუება რეჟიმისთვის რაიმე სახის მხარდაჭერას და გააგრძელებს იმ პირების გამოვლენას, მხილებასა და იზოლირებას, რომლებიც ირანს ხელს უწყობენ", — განაცხადა აშშ-ის სახაზინო მდივანმა სკოტ ბესენტმა

სახაზინო დეპარტამენტის განცხადებით, სანქციების მიზანია თეირანის შესაძლებლობების შეზღუდვა, აღადგინოს იარაღის პროგრამები, ასევე იმ პირებისა და ორგანიზაციებისთვის ხარჯების გაზრდა, რომლებიც ირანს შესყიდვებში ეხმარებიან.

სამშაბათს სანქციები დაუწესდა:

სეიედ ასგარ ალიზადე ტაბატაბაის — პეკინში მოქმედ ირანის თავდაცვისა და შეიარაღებული ძალების ლოგისტიკის სამინისტროს წარმომადგენელს, რომელიც, სახაზინო დეპარტამენტის ინფორმაციით, ირანის სახელით ჩინეთში მზა იარაღის სისტემებისა და ორმაგი დანიშნულების კომპონენტების შესყიდვებს კოორდინირებდა;

ირანში მოქმედ Kavoshcom Asia R&D Group-ს, რომელიც, სახაზინო დეპარტამენტის განცხადებით, Iran Aircraft Manufacturing Industrial Company-სთვის ელექტრონულ კომპონენტებს, მათ შორის კონექტორებს, ყიდულობდა;

ჰონგ-კონგში დაფუძნებულ EC Mojo Technology Co Limited-ს, რომელიც, სახაზინო დეპარტამენტის ინფორმაციით, Kavoshcom-ის შესყიდვებისთვის ელექტრონულ კომპონენტებს აწვდიდა, და კომპანიის ჩინეთში მოქმედ წარმომადგენელ ლი ფენს;

პაკისტანში მოქმედ ვასიმ ფაშა ტაჯამალს, რომელიც კერძო თავდაცვის კომპანია Cavalier Group-ის თავმჯდომარეა. კომპანიას პაკისტანსა და სხვა ქვეყნებში აქვს წარმომადგენლობები;
რუსეთში მოქმედ სააქციო საზოგადოება "ექსპერიმენტული საკონსტრუქტორო ბიურო ა.ს. იაკოვლევის სახელობის" — ავიამწარმოებელს;

რუსეთში მოქმედ MG-Flot LLC-ს — საზღვაო გადამზიდავ კომპანიას, რომლის გემებიც, აშშ-ის ინფორმაციით, რუსეთის მთავრობისთვის იარაღს გადააადგილებენ;

ირანში მოქმედ Saha Airlines-ს — ავიაკომპანიას, რომელიც ქვეყნის საჰაერო ძალებთან არის დაკავშირებული.

Obsidian Risk Advisors-ის მმართველმა პარტნიორმა ბრეტ ერიქსონმა განაცხადა, რომ ახალი სანქციები ნაკლებად შეუშლის ხელს ირანს ჰორმუზის სრუტეში რაკეტებისა და დრონების გაშვებაში.

"ეს ტრამპის ადმინისტრაციისთვის იმიჯის მართვაა, რათა განაცხადონ — "ჩვენ მათ ძლიერად ვურტყამთ", მაშინ როდესაც სინამდვილეში კბილის ჩხირით ვჩხვლეტთ", — განაცხადა მან.