აფხაზეთის ირგვლივ არსებული ვითარება კვლავ რთულია. საქართველოში კვლავ რჩებიან ძალები, რომლებმაც არ მიატოვეს აფხაზეთის ძალით დაბრუნების იდეა, და ეს მოითხოვს მუდმივ მზადყოფნას სამშობლოს დასაცავად, — ამის შესახებ ოკუპირებული აფხაზეთის ე.წ პრეზიდენტმა ბადრა გუნბამ სოხუმში, ე.წ. "აფხაზეთის ხალხის სამამულო ომში გამარჯვების 33-ე წლისთავისადმი" მიძღვნილ სამხედრო აღლუმზე სიტყვით გამოსვლისას განაცხადა. ინფორმაციას რუსული მედია ავრცელებს.

"დღეს აფხაზეთში მშვიდობიანი ცხოვრებაა, მაგრამ უნდა გვესმოდეს, რომ ჩვენ გარშემო ვითარება კვლავ რთული რჩება. ჩვენ ვხედავთ, რომ საქართველოში კვლავ არიან ძალები, რომლებმაც არ მიატოვეს აფხაზეთის ძალით დაბრუნების იდეა. ეს ჩვენგან მოითხოვს, მუდმივად მზად ვიყოთ სამშობლოს დასაცავად. ჩვენ ვაძლიერებთ აფხაზეთის რესპუბლიკის შეიარაღებულ ძალებს, ვზრდით მათ საბრძოლო მზადყოფნას და ვავითარებთ სამხედრო-ტექნიკურ თანამშრომლობას რუსეთის ფედერაციასთან.

ჩვენ ომი არ გვინდა. ჩვენ ჩვენი ხალხისთვის მშვიდობა და სიმშვიდე გვსურს. მაგრამ მზად უნდა ვიყოთ ჩვენი მიწის, თავისუფლებისა და დამოუკიდებლობის დასაცავად. დღევანდელი აღლუმი მხოლოდ გამარჯვებულთა თაობისთვის მიგებული პატივი არ არის. ეს არის იმის დასტური, რომ აფხაზეთს ახსოვს თავისი ისტორია და შესწევს ძალა, დაიცვას სამშობლო", — თქვა გუნმამ.