2026 წლის მეორე კვარტალში ევროკავშირიდან მესამე ქვეყნებში გაძევებულთა რაოდენობით, საქართველო მესამე ადგილზეა 2 140 მოქალაქით თურქეთისა (3 765) და სირიის (2 770) შემდეგ. ამავე პერიოდში ევროკავშირის ქვეყნიდან ქვეყნის დატოვება ყველაზე ხშირად ალჟირის (10 390), მაროკოს (6 200) და სირიის (5 180) მოქალაქეებს დაევალათ.

ევროსტატის მონაცემებით, 2026 წლის მეორე კვარტალში ევროკავშირის ქვეყნებმა ევროკავშირის არაწევრი ქვეყნების 110 335 მოქალაქეს ქვეყნის დატოვების გადაწყვეტილება გამოუტანეს, ხოლო 36 825 ადამიანი შესაბამისი გადაწყვეტილების საფუძველზე მესამე ქვეყნებში დააბრუნეს.

2025 წლის მეორე კვარტალთან შედარებით, ევროკავშირის არაწევრი ქვეყნების იმ მოქალაქეების რაოდენობა, რომლებსაც ქვეყნის დატოვება დაევალათ, 12%-ით შემცირდა, ხოლო მესამე ქვეყნებში დაბრუნებულთა რაოდენობა 9.7%-ით გაიზარდა.

წინა კვარტალთან შედარებით, ევროკავშირის არაწევრი ქვეყნების იმ მოქალაქეების რაოდენობა, რომლებსაც ქვეყნის დატოვება დაევალათ, 3.9%-ით შემცირდა, ხოლო მესამე ქვეყნებში დაბრუნებულთა რაოდენობა 5.9%-ით გაიზარდა.

ევროკავშირის არაწევრი ქვეყნების მოქალაქეებისთვის ქვეყნის დატოვების შესახებ ყველაზე მეტი გადაწყვეტილება საფრანგეთში (32 420), პორტუგალიასა (11 190) და გერმანიაში (8 160) მიიღეს.

მესამე ქვეყნებში დაბრუნებულთა ყველაზე მაღალი მაჩვენებელი გერმანიაში (8 400), საფრანგეთსა (3 825) და პოლონეთში (3 005) დაფიქსირდა.