ევროპულის საქართველოს ერთ-ერთი ლიდერის, ოთარ კახიძის განცხადებით, შეცდომები, რომელიც ახლანდელ მმართველ გუნდს აქვს დაშვებული, წინა ხელისუფლების შეცდომებთან შედარებით "სრულად ასიმეტრიულია".

"შეცდომები აქვს დაშვებული წინა ხელისუფლებას, მაგრამ ივანიშვილის შეცდომებთან და დანაშაულებებთან შედარებით, ჩემი აზრით, არის სრული ასიმეტრია. თუ რაიმე მნიშვნელოვანი წინსვლა გვაქვს ქვეყანაში ბოლო 20 წლის განმავლობაში, ეს უკავშირდება 2004-2012 წლების პერიოდს და ეს იყო უდიდესი წინ გადადგმული ნაბიჯი. თუმცა, რა თქმა უნდა, შეცდომები იყო, თუმცა არა მიხეილ სააკაშვილის მიერ დაშვებული, არამედ, წინა ხელისუფლების მხრიდან", — განაცხადა კახიძემ.

კახიძე ამბობს იმასაც, რომ მიხეილ სააკაშვილი არის პოლიტიკური დევნილი ივანიშვილის მხრიდან და მის წინააღმდეგ წარმოებული ბრალდებები არის შეთითხნილი, რაც ინტერპოლის გენერალურ სამდივნოს მიერაც არის დადასტურებული.