"როცა ასე მოძველბიჭო ენით რაღაცას წერ, თვითონ პოლიტიკოსზე მეტყველებს", — ასე ეხმაურება ნაციონალური მოძრაობის მაჟორიტარი დეპუტატობის კანდიდატი ხატია დეკანოიძე ევროპული საქართველოს ლიდერის, გიგი უგულავას კრიტიკას. მას შემდეგ რაც დეკანოიძე სტრატეგია აღმაშენებლის ლიდერს, გიორგი ვაშაძეს კონკურენტად დაუდგა, უგულავამ დაწერა: "ძალა ერთობაშია თუ გადაღუნვაში?"

On.ge-სთან საუბრისას ხატია დეკანოიძე აცხადებს, რომ უგულავას განცხადება არაეთიკურია, "მაგრამ არა უშავს, ეს ჩემი პირადი წყენა ნამდვილად არ არის"

"მე არ მაქვს პოლიტიკური სენტიმენტები პოლიტიკოსების მიმართ. ჩემი ერთადერთი სენტიმენტი არის ის წარმოდგენა ქვეყანაზე, როგორ უნდა განვითარდეს", — განაცხადა დეკანოიძემ.

მანვე აღნიშნა, რომ ევროპული საქართველოს მხრიდან ნაციონალურ მოძრაობაზე თავდასხმა ახალი არ არის. ხოლო მათი და ვაშაძის დროებითი გაერთიანება არასერიოზულ ნაბიჯად და შეცდომად შეაფასა, რადგან ევროპულ საქართველოსა და გიორგი ვაშაძეს, "პრაქტიკულად, ერთნაირი რეიტინგი აქვთ".

სტრატეგია აღმაშენებლის ლიდერმა, გიორგი ვაშაძემ განაცხადა, რომ ნაციონალურმა მოძრაობამ სიტყვა გატეხა, როდესაც ისანში კონკურენტად ხატია დეკანოიძე დაუყენა.

"ნაციონალურმა მოძრაობამ კვლავ გატეხა სიტყვა, დაარღვია შეთანხმება და ეს არის ძალიან სამწუხარო. რაც შეეხება ისანს, ისანში გაიმარჯვებს ყველაზე ღირსეული. ამას თქვენ თვითონ ნახავთ. ამის დასტურია სხვა შეთანხმების მონაწილეების განცხადებები. ძალიან ვწუხვარ...", — აცხადებს ვაშაძე.

გაიგეთ მეტი: