ერთიანმა ნაციონალურმა მოძრაობამ ისანში მაჟორიტარობის კანდიდატი დაასახელა. ამ ოლქში ხატია დეკანოიძე იბრძოლებს.

პარტიის ერთ-ერთი წევრის, სალომე სამადაშვილის თქმით, ისნის მაჟორიტარულ ოლქში პოლიტიკური რეალობა შეიცვალა, მას შემდეგ, რაც ამ ოლქში გაერთიანებული კანდიდატი იქნა წარდგენილი, ამიტომ აქ საკუთარი კანდიდატურის დაყენების გადაწყვეტილება მიიღეს.

"ჩვენ მიგვაჩნია, რომ ამ ახალმა პოლიტიკურმა რეალობამ ბატონი ვაშაძის გარშემო შეცვალა, ასევე, მისი შანსები, რომ დაამარცხოს ბიძინა ივანიშვილის კანდიდატი აღნიშნულ ოლქში. რამდენადაც ჩვენი ამოცანა არის რაც შეიძლება მეტ მაჟორიტარულ ოლქში დავამარცხოთ ივანიშვილის კანდიდატები, სწორედ ამ ინტერესებიდან გამომდინარე, რაც არის ვფიქრობ, ყველა ოპოზიციური პარტიის ინტერესი, გადავწყვიტეთ ისანში წარვადგინოთ ერთიანი ნაციონალური მოძრაობის კანდიდატი", — აცხადებს სალომე სამადაშვილი მთავარი არხის ეთერში.

27 ივლისს, გიორგი ვაშაძემ და თაკო ჩარკვიანმა პოლიტიკურ პარტიათა კოალიცია, ძალა ერთობაშია დატოვეს და ახალი პოლიტიკური პლატფორმა, სტრატეგია აღმაშენებელი წარადგინეს. მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.

კოალიციიდან წასვლის შემდეგ ვაშაძე ენმ-ს წევრებმა გააკრიტიკეს. მათ შორის, პარტიის ლიდერმა, მიხეილ სააკაშვილმა მისი წასვლა "ბნელ მხარეზე" გადასვლად შეაფასა. პასუხად ვაშაძემ ვარსკვლავური ომების პერსონაჟის ტანზე თავი მიიფოტოშოფა და დაპოსტა, რომ ბნელ ძალას დაამარცხებდა.

რაც შეეხება მაჟორიტარ კანდიდატებს, გიორგი ვაშაძე ოპოზიციის გაერთიანების საერთო კანდიდატებს შორის იყო დასახელებული იქამდე, სანამ ძალა ერთობაშიას დატოვებდა.