არასამთავრობო ორგანიზაციების მოწოდების შემდეგ, შერიგებისა და სამოქალაქო თანასწორობის საკითხებში სახელმწიფო მინისტრის აპარატში აცხადებენ, რომ რეგიონებს პანდემიამდე და პანდემიის დროსაც ეხმარებიან. არასამთავრობოები მოუწოდებდნენ მთავრობას, ოკუპირებული აფხაზეთისა და სამხრეთ ოსეთის რეგიონისთვის დახმარება გაეძლიერებინათ.

უწყების განმარტებით, პირველი, რაც კორონავირუსის პანდემიის დაწყებისას გაკეთდა აფხაზურ და ოსურ ენებზე კოვიდ-ინფექციასთან გამკლავებისა და პრევენციული ზომების შესახებ ინფორმაციის თარგმნაა. მათივე ინფორმაციით, გამოცდილების გაზიარების მიზნით, ადგილობრივი ექიმებისთვის რეგულარულ რეჟიმში მიმდინარეობს ონლაინ-კონსულტაციის გაწევა და შესაბამისი რჩევების მიცემა ქართველი სპეციალისტების მიერ.

გარდა ამისა, უწყების განცხადებით:

• საქართველოს ხელისუფლების მხარდაჭერით, აფხაზეთის რეგიონში განხორციელდა ჯანდაცვის მსოფლიო ორგანიზაციის მისია, ადგილზე არსებული მდგომარეობის შეფასებისა და რეკომენდაციების შემუშავებისთვის;
• პანდემიასთან გასამკლავებლად, საქართველოს ხელისუფლებისა და საერთაშორისო ორგანიზაციების მიერ აფხაზეთის რეგიონს რეგულარულად მიეწოდება სამედიცინო აღჭურვილობა, მედიკამენტები და ჰიგიენური საშუალებები;
• მიმდინარეობს კორონავირუსით ინფიცირებული ადამიანების მკურნალობა საქართველოს კონტროლირებად ტერიტორიაზე. კერძოდ, ოკუპირებულ აფხაზეთში პანდემიის გავრცელების დღიდან, ცენტრალური ხელისუფლების კონტროლირებად ტერიტორიაზე სამკურნალოდ 4 პაციენტი, მათ შორის ორი სამედიცინო სფეროს წარმომადგენელი გადმოიყვანეს. მათგან ერთი უკვე გამოჯანმრთელდა, ხოლო სამის მკურნალობა გრძელდება;
• ენგურის ხიდთან გაიხსნა საველე ჰოსპიტალი, სადაც განთავსებული ექიმები ოკუპირებული ტერიტორიიდან გადმოსულ თითოეულ პაციენტს უზომავენ სიცხეს და ჩივილების შესაბამისად ხდება მათი გადაყვანა სხვადასხვა სამედიცინო დაწესებულებაში;
• ინფიცირებული პაციენტების მკურნალობის მიზნით, აღიჭურვა და მუშაობა დაიწყო რუხის საავადმყოფომ, რომელიც ოკუპირებულ ტერიტორიაზე მცხოვრები მოსახლეობისთვის უფასო სამედიცინო მომსახურებაზე გამარტივებული წვდომის უზრუნველსაყოფად აშენდა.

უწყების ინფორმაციით, 22 მარტიდან დღემდე საქართველოს ოკუპირებული რეგიონებიდან ცენტრალური ხელისუფლების კონტროლირებად ტერიტორიაზე 1 000-მდე ადამიანი გადმოვიდა, აქედან 316 სასწრაფო სამედიცინო დახმარების საჭიროების მქონე პაციენტი სხვადასხვა დიაგნოზით პირდაპირ საავადმყოფოებში გადაიყვანეს, ხოლო პირს საკარანტინე პერიოდის გავლის შემდეგ შესაბამისი სამედიცინო დახმარება გაეწია.

სახელმწიფო მინისტრის აპარატში აღნიშნავენ, რომ ახალგორის მიმართულებით ე.წ. გადასასვლელი პუნქტის დახურვის შედეგად, ამ დრომდე სრულიად ჩაკეტილი და ხელოვნურად იზოლირებული რჩება ცხინვალის რეგიონი. მათივე თქმით, ხელისუფლებამ იმთავითვე გამოთქვა ადგილობრივი მოსახლეობის დახმარების მზადყოფნა, როგორც საჯაროდ, ისე საერთაშორისო პარტნიორებისა და ცხელი ხაზის მეშვეობით, თუმცა ამ დრომდე ამის შესაძლებლობა არ არსებობს.

აფხაზეთის ტერიტორიაზე არსებული ერთადერთი გადასასვლელი, რომელსაც ევროკავშირის სადამკვირვებლო მისიის კვლევის მიხედვით, დღეში 2 000-ზე მეტი ადამიანი კვეთდა, საქართველოში მიმდინარე წლის 27 თებერვლიდანაა ჩაკეტილი, მას შემდეგ რაც საქართველოში კორონავირუსის პირველი შემთხვევა დაფიქსირდა. ცხინვალში ბიბილოვის რეჟიმმა ადმინისტრაციული საზღვარი გაცილებით ადრე ჩაკეტა.

კონფლიქტის ზონაში დარჩენილი მოსახლეობა პანდემიის შემდეგ არსებულ გაუსაძლის ჰუმანიტარულ მდგომარეობაზე საუბრობს. პანდემიის შემდეგ, განსაკუთრებით, დაზარალდა გალისა და ახალგორის ქართულენოვანი მოსახლეობა, რომელიც, ძირითადად, ქართულ ბაზარსა და ქართულ პენსიებსა და სოციალურ დახმარებებზე იყვნენ დამოკიდებულნი.

ადამიანის უფლედამცველი არასამთავრობო ორგანიზაციები რეგიონებში არსებულ მძიმე ვითარებაზე თავიანთ ანგარიშებში ეხმაურებიან.