შინაგან საქმეთა სამინისტროს ინფორმაციით, თეთრიწყაროში 2 კილო და 300 გრამი ნარკოტიკული საშუალება ამოიღეს, რომელიც ჰეროინს, მორფინს და კოდეინს შეიცავს. უწყებაში ამბობენ, რომ განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით 1958 წელს დაბადებული ს.ა., დააკავეს.

"სამართალდამცველებმა ბრალდებული თეთრიწყაროს მუნიციპალიტეტის ტერიტორიაზე, ავტომობილით გადაადგილებისას შეაჩერეს. დაკავებულის კუთვნილი ავტომანქანის ჩხრეკის შედეგად, პოლიციამ ნივთმტკიცების სახით ამოიღო 2 კილო და 300 გრამი ნარკოტიკული საშუალება, რომელიც ჰეროინს, მორფინს და კოდეინს შეიცავს“, — აღნიშნულია განცხდებაში.

შსს-ს ინფორმაციით, გამოძიება სისხლის სამართლის კოდექსის 260-ე მუხლის მე-6 ნაწილის "ა" ქვეპუნქტით მიმდინარეობს, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვას გულისხმობს.