აჭარის ავტონომიური რესპუბლიკის მთავრობის მეთაური, ირაკლი რიჟვაძე, TI-ს კვლევას უნდობლობას უცხადებს. რიჟვაძე ამბობს, რომ აჭარაში არც ერთი კომპანია არაა პრივილეგირებულ მდგომარეობაში.

"ეს ის ორგანიზაცია, ხო, ადგილობრივი კანტორა რო აქვთ აქ გახსნილი და ოფის-მენეჯერები იკვლევენ და იურიდიულ დასკვნებს აკეთებენ? აჭარაში მაგ დასკვნებს აკეთებენ ჩვეულებრივი ოფის-მენეჯერები, შედიან იურიდიულ, ეკონომიკურ, დისციპლინარულ საკითხებში, რომლის წარმოდგენაშიც არ არიან. არც დისკრიმინაციული და არც პრივილეგირებული მიდგომა არ ყოფილა არც ერთს კომპანიასთან მიმართებაში. ჩვენ ყველას ერთიანად, საჯარო ინტერესის დაცვით, მათ შორის ბიზნესს, ვეხმარებით. თუ სანქციებია საჭირო, არც მაგაზე ვიკავებთ თავს", —ამბობს რიჟვაძე.

საერთაშორისო გამჭვირვალობა — საქართველომ აჭარის მთავრობას მოუწოდა, მკაცრად დაიცვას ქონების განკარგვის ხელშეკრულების პირობები, ქონების განსაკარგად პირობიანი აუქციონის გამოცხადებისას განისაზღვროს მეტი საგარანტიო პირობები, შეიქმნას თანაბარი პირობები ყველა ინვესტორისთვის, რაც ხელს შეუწყობს ჯანსაღი საინვესტიციო გარემოს ჩამოყალიბებას.

ამასთან, ორგანიზაციამ დააგინა, რომ 2019 წლის 1 იანვრიდან 2020 წლის 9 იანვრის ჩათვლით 26 ხელშეკრულებაში შევიდა ცვლილება, საიდანაც 9-ის წარმომადგენლები, მეწილეები და დირექტორები მმართველი პარტიისა და სალომე ზურაბიშვილის შემომწირველები არიან.