როგორც იქნა, ბიუჯეტს თავი მოუყარე, იპოთეკა აიღე და სახლი იყიდე — ვაშაა! მაგრამ ახლა ყველაზე რთული ნაწილი იწყება: ეს სახლი შენი უნდა გახდეს. განურჩევლად იმისა, მთლიანად გსურს სახლის გარემონტება თუ, უბრალოდ, მცირეოდენ შენს ჭკუაზე მოწყობა, სახლის დიზაინის შეცვლა იმაზე უფრო რთულია, ვიდრე წარმოგიდგენია.

სახლის განახლების კონსულტანტისა და ინტერიერის დიზაინერის რჩევების გათვალისწინებით, წარმოგიდგენთ ყველაზე ხშირ 10 შეცდომას, რომელიც რემონტის დროს არ უნდა დაუშვა:

1. რემონტის ზედმეტად ადრე დაწყება

თუკი შესაძლებელია, სახლში ცოტა ხანი გეგმების შედგენამდეც იცხოვრე, საგულდაგულოდ რომ შეამოწმო ყველაფერი. შეისწავლე სახლის კონტურები და გაიგე, სად უნდა განთავსდეს ნივთები, სად უნდა იყოს სამრეცხაო კუთხე, საიდან ურტყამს მზე — ერთი სიტყვით, სახლის სული შეიგრძენი. ეს ყველაფერი დაგეხმარება იმის მიხვედრაში, თუ როგორი ცვლილებები უნდა დაგეგმო შენი სახლისთვის.

2. ბევრ ოთახზე ერთდროულად მუშაობა

ყველას, ვისაც ბიუჯეტში ჩატევა უწევს (ანუ, პრინციპში, ყველას), საცხოვრებელ სივრცეებზე ფოკუსირებას ვურჩევთ. რამდენიმე ოთახში ცოტ-ცოტას გაკეთება მარტო არამდგრადობისა და იმედგაცრუების შეგრძნებას დაგიტოვებს. შენი ყველაზე მეტი დრო და ენერგია იმ სივრცეს უნდა დაუთმო, სადაც ყველაზე მეტ დროს გაატარებ. ბიუჯეტი თუ ამის საშუალებას მოგცემს, სხვა სივრცეზეც გადაინაცვლე.

3. დანახარჯების გაუთვალისწინებლობა

საქმეთა უმრავლესობა მოსალოდნელზე უფრო მეტი დაჯდება და მეტხანს გაგრძელდება, ამიტომ ყოველთვის დაუმატე 20 პროცენტი შენი წარმოდგენით გათვალისწინებულ ბიუჯეტს. საკმარისი სახსრები თუ არ გაქვს, გამოაკელი რაღაც სამუშაოები და საბოლოოდ თუ პროგნოზებს აჯობებ, ძალიანაც კარგი!

4. ხარისხზე დაზოგვა

ფული განსაკუთრებით ისეთ რაღაცებზე უნდა დახარჯო, რასაც ყოველდღე ეხები. მაგალითად, კარები, ონკანი, საყოფაცხოვრებო ელექტროხელსაწყოები, სამზარეულოს კარადა. ნივთებზე შეხება ყოველდღიურად შეგახსენებს შენი სახლის საიმედოობასა და ხარისხს.

მეორე მხრივ კი, ნუ გეგონება, რომ ყველაზე დიდ ნივთებზე ყველაზე ბევრი უნდა დახარჯო — პატარა და ლამაზმა ბალიშებმა, შესაძლოა, საშუალო ხარისხის დივანს სრულიად ახალი ელფერი შესძინოს.

5. იმის ფიქრი, რომ ყველაფერი გეგმის მიხედვით წავა

ძველ შენობებზე მუშაობას ბევრი გაუთვალისწინებელი რამ ახლავს თან. ვინ იცის, რა იმალება ამ ძველი კედლის მიღმა? ახალი ნაგებობები უფრო მეტად კონტროლირებადია, თუმცა ეს საქმის გარანტირებულ სიმარტივეს არ ნიშნავს. მზად იყავი მოვლენების მოულოდნელი განვითარებისთვის. ადამიანების ხშირი პრობლემა ისაა, რომ გვგონია, ყოველთვის ყველაფერი გეგმის მიხედვით წავა — სამწუხაროდ, არა.

6. ზედმეტად პატარა ხალიჩების ყიდვა

არასაკმარისად დიდი ზომის ხალიჩების ყიდვა ერთ-ერთი ყველაზე ხშირი შეცდომაა. ხალიჩა ისე უნდა ფარავდეს ავეჯს, რომ მისი წინა ფეხები მაინც იყოს ხალიჩაზე. სახლს თუ სტანდარტული ზომები არ მოერგება, არ ინერვიულო. ხალიჩების ადგილობრივ მაღაზიას მიაკითხე და სასურველი ზომისა და ფორმის ხალიჩა დაამზადებინე.

7. ზომების არცოდნა

როცა გაარკვევ, რა ზომის სავარძლები, დივანი, მაგიდები და კედლის სანათები გჭირდება, ჩაიწერე ეს ზომები და ყოველთვის თან იქონიე. არასდროს იცი, გზად როდის გადაეყრები შენი სახლისთვის იდეალურ ნივთს. 240-სანტიმეტრიანი დივანი ნუ შეგიყვარდება, თუ მხოლოდ 220 სანტიმეტრის ადგილი გაქვს.

8. გიგანტური ავეჯის ყიდვა

და ბარემ, რახან ზომების აღებაზე მიდგა საქმე, შენი სახლის მთავარი შესასვლელის ზომებიც გაარკვიე და დარწმუნდი, რომ რასაც იყიდი, კარში გაეტევა. გაგიკვირდება, რამდენად ხშირად ავიწყდება ხოლმე ხალხს ეს.

9. გზადაგზა ზედმეტად ბევრი რამის შეცვლა

შესაძლოა, ზოგი საქმე ძალიან მარტივი გეჩვენებოდეს, მაგრამ, სინამდვილეში, მის უკან უამრავი სამუშაო იმალებოდეს, ამიტომ ყველაზე პატარა ცვლილებებიც კი აუცილებლად დროულად შეათანხმე რემონტის ხელმძღვანელთან ან დიზაინერთან. სინათლის გადამრთველის რამდენიმე ათეული სანტიმეტრით გადაწევაც კი, შესაძლოა, ასობით ან ათასობით ლარი დაჯდეს.

10. არასაკმარისი შეკითხვების დასმა

და, რაც მთავარია, გახსოვდეს: დასვი ძალიან ბევრი შეკითხვა. არ არსებობს სულელური შეკითხვები — როცა საკუთარ ფულს ხარჯავ, უნდა იცოდე, რაზე და რატომ.

სახლის თანამედროვე, გამორჩეული დიზაინით მოწყობაში ამიერკავკასიაში ყველაზე დიდი სამშენებლო და სარემონტო მასალების ჰიპერმარკეტი მიჰაუსი დაგეხმარებათ. 12 000 კვ. მეტრზე გაშლილ სივრცეში თქვენ შეხვდებით 60 000-მდე დასახელების პროდუქციას მსოფლიოს მრავალი ქვეყნიდან.

პროდუქციის ვირტუალურ ინტერიერში აღქმის შესაძლებლობით, ონლაინ მაღაზიით, სწრაფი მიტანის სერვისით, ლოიალურობის პროგრამებითა და სხვა უპირატესობებით მიჰაუსი თქვენი სახლის თუ სამუშაო სივრცის სიმყუდროვესა და კომფორტს უზრუნველყოფს.