კინოთეატრში ფილმის პრემიერისას მისული მაყურებლები რომ არ უნდა დაასპოილერო, ეს ბევრი ჩვენგანისთვის დაუწერელი წესია. ამ წესის დარღვევას რომ კარგი არაფერი მოჰყვება, კიდევ ერთხელ დადასტურდა.

ცოტა ხნის წინ სოციალურ ქსელებში ვირუსულად გავრცელდა ვიდეო, რომელიც Spider Man: Brand New Day-ის პრემიერის დროსაა გადაღებული. როგორც კადრებში ვხედავთ, ჩვენება აპლოდისმენტების ნაცვლად ქაოსით დასრულდა.

როგორც პოსტის ავტორის მონათხრობიდან ვიგებთ, 4 მეგობარი Spider Man: Brand New Day-ის სანახავად კინოთეატრში წავიდა. მათი ადგილები კი სხვა მაყურებელი კაცისა და მისი თანმხლები ქალის გვერდით აღმოჩნდა. კაცს ფილმი უკვე ნანახი ჰქონდა და იმის ნაცვლად, რომ ჩუმად ეყურებინა, თანმხლებ ქალს მომდევნო სცენების სიუჟეტს წინასწარ ეუბნებოდა. შედეგად კი, ირგვლივ მსხდომმა მაყურებლებმა ფილმის მთელი სიუჟეტი მოისმინეს.

სპოილერებმა მათ გვერდით მსხდომი ოთხი მეგობარი წყობიდან გამოიყვანა. პოსტის თანახმად, დაპირისპირება მალევე ფიზიკურ ჩხუბში გადაიზარდა, რამაც კინოსეანსი შეაფერხა. "ოთხი მეგობარი კაცს პირდაპირ კინოდარბაზში წაეჩხუბა. სიტუაცია გამწვავდა და ერთმანეთის ცემაც დაიწყეს, რამაც კინოთეატრში სრული ქაოსი გამოიწვია", — წერს პოსტის ავტორი.

შეგახსენებთ, რომ პრემიერიდან 6 დღეში Spider-Man: Brand New Day-ს შემოსავალმა მილიარდ დოლარს გადააჭარბა. ამ მაჩვენებლით Spider-Man: Brand New Day მეორე ფილმია, რომელმაც მილიარდიან ნიშნულს ასე სწრაფად მიაღწია. რეკორდსმენად კვლავ Avengers: Endgame რჩება, რომლის შემოსავალმაც 2019 წლის აპრილში, გამოსვლიდან პირველივე შაბათ-კვირას, $1.2 მილიარდი შეადგინა.