შინაგან საქმეთა მინისტრი ჟურნალისტების კითხვაზე — რას აკეთებს სახელმწიფო უკანონო "ბორდერიზაციისა" და ე.წ. საზღვართან გადატაცებების პრევენციისთვის, უპასუხა, რომ კითხვები წინა ხელისუფლებას უნდა დაუსვან, ვის დროსაც ომი მოხდა.

"ჩვენ ყველაფერს ვაკეთებთ, როგორც საერთაშორისო ჩვენი მეგობრობის ჩართულობით, ასევე ორგანიზაციების ჩართულობით. ჩვენ სხვას ვერაფერს ვერ გავაკეთებთ, ვერ დავიწყებთ ომს. ვინც ჩვენ მაგას გვეუბნება, რატომ არაფერს არ აკეთებთო, ზუსტად ეგენი იყვნენ ხელისუფლებაში და კითხვას თუ დაუსვამთ მათ, თუ რატომ მოხდა 2008 წლის ომი, ძალიან კარგი იქნება და 2008 წლის ომის შემდეგ ჩვენი გმირების გვამები ისევ აქ, მინდორში ესვენა და თბილისში დისკოტეკები იყო გამართული და ზეიმები. რატომ ხდებოდა? რას ზეიმობდნენ? კარგი იქნება თუ ამ კითხვებს დაუსვამთ მათ", — განაცხადა მინისტრმა.

შინდისის ბრძოლა 2008 წლის 11 აგვისტოს მოხდა. რუსულ სამხედრო ნაწილთან შეტაკების დროს 17 ქართველი ჯარისკაცი დაიღუპა: ალექსანდრე ონიანი, ნიკოლოზ ფორჩხიძე, ზვიად კაცაძე, ემზარ წილოსანი, ილია შეყლაშვილი, ფელიქს კაკაურიძე, ირაკლი ჯანელიძე, თეიმურაზ ბერიძე, კახა კოშაძე, ლევან მელქაძე, მარლენ ბარამია, ვეფხვია ჯიშკარიანი, მიხეილ დვალიშვილი, რომან ზოიძე, რუსლან წულაძე, ილია გაბუნია და შმაგი კუპატაძე.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.