საქართველოს პრემიერმინისტრის განცხადებით, 2008 წლის აგვისტოში რუსეთის ჯარი შემოიჭრა საქართველოს ტერიტორიაზე, "მაშინდელი ხელმძღვანელობის, მათ შორის ვლადიმერ პუტინის დავალებით". ასე უპასუხა გიორგი გახარიამ ჟურნალისტების კითხვას, რატომ არ უხსენებია პუტინი გუშინ, 7 აგვისტოს გაკეთებულ განცხადებებში.

ამასთან, პრემიერმინისტრს ჰკითხეს, აქვს თუ არა კითხვები იმასთან დაკავშირებით, ვინ დაიწყო რუსეთ-საქართველოს ომი, რაზეც გიორგი გახარიამ გაიმეორა, რომ "რუსეთის შეიარაღებულმა ძალებმა გადმოლახეს საქართველოს საზღვარი და სრულმასშტაბიანი აგრესია განახორციელეს"

"ბევრჯერ მითქვამს, კიდევ ერთხელ გავიმეორებ, რომ აგვისტოში რუსეთმა, რუსეთის შეიარაღებულმა ძალებმა გადმოლახეს საქართველოს საზღვარი და სრულმასშტაბიანი აგრესია განახორციელეს. ასე დაიწყო ომი საქართველოში. ამ ომის შედეგად დღეს ჩვენ დაკარგული გვაქვს, უკვე სრულად ოკუპირებული გვაქვს 20% ტერიტორიებისა, ასობით ჩვენი მოქალაქე დავკარგეთ, ქვეყნის განვითარების პერსპექტივა დავკარგეთ და როცა ოკუპირებულ ტერიტორიებზე ვსაუბრობთ, თქვენ ხო არ გგონიათ, რომ ეს მიწაზეა მხოლოდ საუბარი, ადამიანებზეა საუბარი. დღეს საქართველოში გვყავს მხოლოდ ამ ომის შემდგომ 30 000 საკუთარი სახლიდან დევნილი ადამიანი, ეს არის ამ ომის შედეგები", — განაცხადა გახარიამ.

მან ისაუბრა მშვიდობის მნიშვნელობაზეც და აღნიშნა, რომ ეს არის ერთადერთი შესაძლებლობა ქვეყნის განვითარებისთვის.

"ჩვენ ყოველთვის ვამბობდით და კიდევ ერთხელ ხაზგასმით აღვნიშნავ, რომ მშვიდობა და მშვიდობიანი ქმედებები, მშვიდობიანი პოლიტიკა, გონივრული პოლიტიკა არის ერთადერთი შესაძლებლობა იმისთვის, რომ ქვეყანაში მოხდეს განვითარება. მშვიდობა ნებისმიერი განვითარების უპირობო და აუცილებელი პირობაა", — თქვა მან.

პრემიერმინისტრი გახარია მთავრობის წევრებთან და პრეზიდენტთან ერთად მუხათგვერდის ძმათა სასაფლაოზე იმყოფებოდა, რათა აგვისტოს ომის დაღუპული გმირებისთვის პატივი მიეგო.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.