ვიცე-პრემიერის, მაია ცქიტიშვილის განცხადებით, შეერთებული შტატების ხელისუფლების ნებისმიერი შტოს წარმომადგენელს განიხილავენ, როგორც სტრატეგიულ პარტნიორსა და მეგობარს, მაგრამ ზოგიერთ გზავნილში "შიდა პოლიტიკური დისკუსია და ოპოზიციური სპექტრის დესტრუქციული ქმედებები იკითხება". მისივე თქმით, ოპოზიცია არასწორ ინფორმაციას აწვდის კონგრესმენებს და მათაც უხერხულ მდგომარეობაში აგდებს. ასე გამოეხმურა ის 6 კონგრესმენის კრიტიკულ წერილს სახელმწიფო მდივან მაიკ პომპეოსადმი.

ცქიტიშვილის განცხადებით, ოპოზიცია ხელისუფლების დაზიანებას ცდილობს და ამ დროს ლახავს ქვეყნის რეპუტაციას, რაც საქართველოს მოქალაქეებს დაეხმარება მომავალ არჩევნებში სწორი გადაწყვეტილების მიღებაში.

"სახელმწიფო მდივან პომპეოსთან კომუნიკაციის შედეგად ვნახეთ რა მაღალ დონეზე შეფასდა ჩვენი დემოკრატიული წარმატებები, საარჩევნო კანონმდებლობის ცვლილება და საერთოდ, ორი ქვეყნის პარტნიორობა, ისევე როგორც ეს ჩანს ყოველდღიურ რეჟიმში საქართველოში აშშ-ის ელჩის განცხადებებში. გარწმუნებთ, ჩვენი ურთიერთობა არის ძალიან მაღალ დონეზე და არაფერი ამ ურთიერთობებს არ ემუქრება", — ამბობს ვიცეპრემიერი.

კონგრესმენებმა წერილში საქართველოში დემოკრატიული მმართველობის გაუარესებაზე ისაუბრეს და ბიძინა ივანიშვილს რუს ოლიგარქად მოიხსენიეს.

"როგორც იცით, 1991 წლის დამოუკიდებლობის დღიდან საქართველომ დიდი ნაბიჯები გადადგა ეკონომიკურ და გეოპოლიტიკურ უსაფრთხოებასთან დაკავშირებული ურთიერთობების ტრანსფორმაციისკენ, იმისათვის, რომ უზრუნველეყო საერთაშორისო სავაჭრო პარტნიორებთან ბაზარზე წვდომა, თავდაცვითი ურთიერთობები, თავისუფალი და სამართლიანი არჩევნები. მიუხედავად ამისა, მას შემდეგ, რაც რუსი ოლიგარქი ბიძინა ივანიშვილი და მისი ქართული ოცნების პარტია 2012 წელს ძალაუფლებაში მოვიდა, ქვეყანა პროგრესს ჩამორჩა", — ვკითხულობთ წერილში.

ამავე წერილში, კონგრესმენები მიმართავენ მაიკ პომპეოს შემდეგ საკითხებზე გაამახვილოს ყურადღება:

  1. "საქართველოს ახლანდელი მთავრობა, რომელსაც უძღვება ქართული ოცნება, არის რუსი ოლიგარქის, ბიძინა ივანიშვილის მანიპულაციის ქვეშ, რომელიც ყველაფერს აკეთებს იმისათვის, რომ ამერიკული ბიზნესები, რომლებიც ათწლეულია ამერიკულ და ქართულ ეკონომიკაში კონტრიბუციას დებენ, ქვეყნიდან გააძევოს. ეს ხდება რუსეთიდან ჩინეთიდან და ირანიდან შემოსული მზარდი კერძო სექტორის სასიკეთოდ;
  2. საქართველოში შავი ზღვის პორტებთან დაკავშირებული აქტივობები საფრთხეს უქმნის ამერიკის ეროვნული უსაფრთხოების კრიტიკულად მნიშვნელოვან ინტერესებს, მათ შორის: ა) შავი ზღვის პორტებიდან ამერიკული კომპანიების ინვესტიციების/მფლობელობის გამოდევნა, მაშინ როცა ამ უკანასკნელების მიზანი საქართველოს ჩინეთისა და რუსეთის გავლენებისგან დაცვა იყო; ბ) ირანისა და რუსეთის წინააღმდეგ დაკისრებული სანქციების არასაკმარისად შესრულება, განსაკუთრებით და კონკრეტულად იმ კონტექსტში, როცა საქმე ეხება საზღვაო პორტის აქტივობებსა და მასთან დაკავშირებული კერძო სექტორის ინვესტიციებს.
  3. ის ფაქტი, რომ საქართველოს პარლამენტს ჯერ კიდევ არ მიუღია აუცილებელი საარჩევნო რეფორმის კანონი, რომელიც გადამწყვეტია 2020 წლის შემოდგომის საპარლამენტო არჩვენების გამჭვირვალედ და სამართლიანად ჩატარებისთვის".

ეს პირველი შემთხვევა არ არის, როდესაც კონგრესმენები ქართული ოცნების ხელისუფლებასა და მათ ლიდერს, ბიძინა ივანიშვილს აკრიტიკებენ. კრიტიკის პასუხად მმართველ გუნდში აცხადებენ, რომ ქართულ-ამერიკული ურთიერთობები განვითარების უმაღლეს ეტაპზეა და ქვეყანას აშშ-ის ხელისუფლების სრული მხარდაჭერა აქვს. "ოცნების" დეპუტატების ნაწილი ამბობს იმასაც, რომ ზოგიერთი კონგრესმენი მიკერძოებულია და სხვადასხვა კომპანიის, მათ შორის ფრონტერას ინტერესებს ატარებს.