Friends-ს წარდგენა არ სჭირდება — საკულტო სიტკომი 1994-2004 წლებში 10 სეზონის განმავლობაში გადიოდა და დღემდე უამრავი ადამიანის საყვარელ სერიალად რჩება.

ფანებს მთავარი სიმღერის, ჯგუფ The Rembrandts-ის შესრულებული I'll Be There For You-ს, თითოეული სიტყვა დაზეპირებული აქვთ და ყოველი სერიის დასაწყისში უნებურად ღიღინებენ მას.

მოიცა, ვინმეს გადახვევის ღილაკზე ხომ არ გიცდებათ ხელი?!

დღეს გაგაცნობთ 10 ფაქტს Friends-ის ცნობილი სიმღერისა და ინტროს შესახებ, რომელიც დიდი შანსია, არ იცოდეთ:

1. შადრევანი მანჰეტენზე არ მდებარეობს

ცნობილი შადრევანი, რომელიც Friends-ის ყოველი ინტროს დროს ჩნდება, სინამდვილეში, მანჰეტენზე არ მდებარეობს. და... ის ნიუ-იორკშიც კი არ არის! შადრევანი კალიფორნიაშია, ბურბანკში, Warner Brothers-ის რანჩოზე.

მეტსაც გეტყვით, შადრევანი ბოლო წუთს აირჩა, როცა მართა კაუფმანი და პროდიუსერები ჩასაწერად იდეალურ ადგილს ეძებდნენ. საკმაოდ შორს კი წასულან!

2. ცნობილი სიმღერა სრულიად სხვანაირი უნდა ყოფილიყო

ცნობილი სიმღერის ყველა სიტყვა ვინც ზეპირად ვიცით, იმათთვის წარმოუდგენელია იმაზე ფიქრი, რომ ამის ნაცვლად სხვა რაიმე შეიძლებოდა ყოფილიყო. თუმცა, კინაღამ იყო! თავდაპირველად შოუს მთავარ სიმღერად R.E.M.-ის Shiny Happy People შეირჩა.

The Rembrandts-ის კანდიდატურა შოუს ერთ-ერთმა პროდიუსერმა კევინ ბრაითმა შემოაგდო და, კევინ, დიდი მადლობა! ღმერთმა გვაშოროს ის ბნელი სამყარო, სადაც Friends-ის ინტროს სხვა სიმღერა ადევს.

3. მთავარი სიმღერის დაწერაში შოუს შემქმნელებიც მონაწილეობდნენ

ეს სიმღერა კი ყველას ძალიან გვიხარია, მაგრამ აღმოჩნდა, რომ The Rembrandts-ის ცნობილი I'll Be There For You, სინამდვილეში, თვითონ შოუს შემქმნელების მონაწილეობით დაიწერა.

ჯგუფის წევრებმა დენი უაილდმა და ფილ სოლემმა აღიარეს, რომ, რეალურად, სიმღერის დაწერაში თვითონ ძალიან ცოტა წვლილი შეიტანეს. ჯგუფს მაინც შეხვდა საავტორო ჰონორარი (დაახლოებით $5 მილიონი) და პროექტის ნაწილად ყოფნაც ძალიან გაუხარდა, თუმცა სიმღერისთვის მთავარი მადლობა შოუს პროდიუსერებს, მართა კაუფმანსა და დევიდ კრეინს, უნდა გადაუხადოთ.

4. სერია "The One After Vegas"-ის ინტრო

მე-6 სეზონის პრემიერას ძალიან გამორჩეული ინტრო ჰქონდა. ეს პირველი ეპიზოდი იყო მას შემდეგ, რაც კორტნი კოქსმა (მონიკა) იქორწინა დევიდ არკეტზე და მას სურდა, ინტროში მისი მეორე გვარიც დამატებულიყო.

ცხადია, და ნაკლებს არც ველოდით, სხვა მსახიობებმაც მის მაგალითს მიბაძეს. ამ ინტროში თითოეული მსახიობის სახელ-გვარს მოსდევს გვარი "არკეტი". არა, არ ვხუმრობთ. თავად იხილეთ:

5. ჯენიფერ ენისტონს მთავარი სიმღერა არ მოსწონდა

ენისტონის თქმით, სინამდვილეში, მთავარი სიმღერა მსახიობებიდან არავის მოსწონდა. ამის წარმოდგენაც კი რთულია და გვჯერა, რომ მათ არასდროს უფიქრიათ, როგორი საკულტო გახდებოდა ეს სიმღერა.

"შადრევანში ცეკვა ცოტა უცნაური ჩანდა, მაგრამ მაინც ვქენით", — თქვა ენისტონმა. საბოლოოდ, მსახიობებმა დათმეს და სერიალის შემქმნელებს მოუსმინეს. კიდევ კარგი.

6. სერიალის მთავარი სიმღერა #1 ჰიტი გახდა

The Rembrandts-ის პოპულარული სიმღერა #1 სინგლი გახდა ამერიკის ჩარტებში! მან პირველი ადგილი დაიკავა US Mainstream Top 40 Billboard-ში, ასევე კვირის #1 ადგილი შოტლანდიასა და კანადაში და თითქმის 10 სხვადასხვა ქვეყნის ჩარტებში მოხვდა!

გარდა ამისა, ცნობილი ინტრო Billboard Hot 100 Airplay-ის ჩარტებს ლიდერობდა მთელი რვა კვირის განმავლობაში. აპლოდისმენტები!

7. საკულტო ნარინჯისფერ დივანს სრულიად შემთხვევით წააწყდნენ

ცნობილი დივანი, რომელის მსგავსსაც ხშირად შეხვდებით Friends-ის თემატურ კაფეებში მთელი მსოფლიოს მასშტაბით, და რომელიც შადრევანთანაც კი ჩნდება სერიალის ინტროში, სინამდვილეში, ძალიან შემთხვევითი და იღბლიანი მონაპოვარია.

დივანი Warner Brothers Studio-ის სარდაფში შემთხვევით აღმოაჩინეს და თქვეს: პრინციპში, რატომაც არა? აბა, იკეა ვის რად უნდა, არა?

8. ინტროს ცნობილ ტაშს შოუს აღმასრულებელი პროდიუსერები უკრავენ

როგორც ჩანს, The Rembrandts-ის წევრებს ტაშისკვრასთან არაფერი ესაქმებათ, თუმცა ძლიერ კი უჭერდნენ მხარს. ცნობილ ტაშს შოუს პროდიუსერები ასრულებენ!

დენი ვაილდის თქმით, 25 მცდელობაზე მეტი გახდა საჭირო, რომ სამ პროდიუსერს ტაში სწორად გამოსვლოდა.

9. "რამდენი ტაშის" დავა The Rembrandts-მა დაასრულა

საკმაო დავის საგანი იყო ის, თუ რეალურად რამდენი ტაში გაისმის Friends-ის ინტროში. ხშირად თვითონ მსახიობებსაც კი უჭირდათ ამის დამახსოვრება.

მეტიც, ჯიმი კიმელის შოუში კორტნი კოქსმა არასწორი რაოდენობის ტაში შემოკრა! დენი ვაილდმა და ფილ სოლემმა დავა დაასრულეს და ვერდიქტია ოთხი ტაში. ხუთი არა. ვწუხვართ, ვინმე თუ დაგამწუხრეთ.

10. მეთიუ პერის ერთფრაზიანი ხუმრობები შუაღამის გადაღებებისას მსახიობებს ახალისებდა

მთავარი სიმღერის ინტრო თავიდან სახურავზე უნდა გადაეღოთ, შადრევანთან გადაღება კი მართა კაუფმანმა გადაწყვიტა ბოლო წამს. უკვე ღამის 4 საათი იყო და მსახიობებს ძალიან უჭირდათ განწყობის შენარჩუნება, თანაც ძალიან ცივ შადრევანში ისე უნდა მოქცეულიყვნენ, თითქოს ეს მათი ცხოვრების უბედნიერესი მომენტი იყო.

ამ დროს, მეთიუ პერიმ (ჩენდლერი) თქვა: "უკვე არ მახსოვს, როდის არ ვიყავი შადრევანში". ალბათ, ჩენდლერის მახვილგონივრული ერთფრაზიანი ხუმრობები სწორედ აქ დაიბადა. და ცალკეულ სიტყვებზე აქცენტირების მისი ცნობილი ჩვევა, რომლის გამოც სხვები დასცინიან ხოლმე? როგორც ჩანს, ეს უბრალოდ მეთიუ პერია.

ბონუსი: ზოგიერთი სერიის ინტრო უფრო ხანმოკლეა

სერიალის ზოგიერთი ეპიზოდის საწყის და საბოლოო კრედიტებში მთავარი სიმღერა მთლიანად ისმის, ვოკალიც და მუსიკაც. მაგრამ შეგიმჩნევიათ, რომ ზოგიერთ სერიაში სიმღერის ვოკალური ნაწილი ამოღებულია და მხოლოდ მუსიკაა დატოვებული?

ტელეარხ TBS-ის გამომცემლის თქმით, შემოკლებული სიმღერა გამოიყენებოდა იმ შემთხვევაში, თუკი ეპიზოდი თავისი საწყისი ფორმით უფრო ხანგრძლივი იყო, ვიდრე დღეისთვის ტელევიზიაში შოუს ნახევარსაათიანი გაშუქებისთვისაა პრაქტიკული: ეს ნახევარ საათში უფრო მეტი სარეკლამო ჭრის ჩასამატებლად გაკეთდა.

Friends თავდაპირველად ტელევიზიაში მაშინ გაეშვა, როდესაც სარეკლამო ჭრები უფრო ხანმოკლე იყო, ვიდრე დღესაა. "დღეისთვის სტანდარტულ ნახევარსაათიან მონაკვეთში ეპიზოდის ჩასატევად, თანაც ისე, რომ სერიის სიუჟეტიდან არაფერი დაკარგულიყო, ზოგჯერ სერიალის ინტროს შემოკლება გვიწევდა", — თქვა TBS-ის გამომცემელმა.