თბილისის ზღვასთან, ჩანჩქერის მიმდებარე ტერიტორიაზე გამაფრთხილებელი ნიშნები დამონტაჟდა. ამ საქმეზე თბილისის მერიასთან სასამართლო დავა ჯერ კიდევ არ დასრულებულა, თუმცა მას შემდეგ, რაც საკითხი მედიაში გაშუქდა, GWP-მ ბანერების აღმართვა გადაწყვიტა.

ინფორმაცია იმის შესახებ, რომ ტერიტორიაზე გამაფრთხილებელი ნიშნები დადგეს, თავდაპირველად ალეკო ცქიტიშვილმა გაავრცელა. მან თქვა, რომ თბილისის ზღვაზე ინტერვიუსთვის მისულს ბანერები ადგილზე დახვდა. სწორედ ის ითხოვს 2017 წლიდან გამაფრთხილებელი ნიშნების განთავსებას და საქალაქო სასამართლოში დავა მოიგო კიდეც, თუმცა მერიამ გადაწყვეტილება სააპელაციო სასამართლოში გაასაჩივრა.

On.ge-ს თბილისის მერიაში უთხრეს, რომ ბანერი მათ არ განუთავსებიათ. კომპანია ჯორჯიან უოთერ ენდ ფაუერის განცხადებით კი, "კეთილი ნება" გამოიჩინეს.

"მიმდებარე ტერიტორიაზე იყო გამაფრთხილებელი ნიშნები. როგორც იცით, თვალსაჩინო იყო, რომ დაზიანდა ის გამაფრთხილებელი ნიშნები, ჩვენ გამოვხატეთ კეთილი ნება და ახალი გამაფრთხილებელი ნიშნები განვათავსეთ", — ამბობენ GWP-ს პრესსამსახურში.

21 ივლისს თბილისის ზღვაში კიდევ ორი ახალგაზრდის ცხედარი იპოვეს. ბოლო ხუთ წელში კი წყალსაცავში სულ მცირე 30 ადამიანი დაიხრჩო. მათ შორის იყო ადამიანის უფლებათა ცენტრის ხელმძღვანელის, ალეკო ცქიტიშვილის შვილიც. სწორედ ამის შემდეგ ცქიტიშვილმა თანამოაზრეებთან ერთად დააფუძნა კამპანია "იცურე მშვიდად". იგი ითხოვს ტერიტორიაზე დამონტაჟდეს ინფრასტრუქტურა, რომლებიც სხვა ადამიანებისთვის გამაფრთხილებელი იქნება და დაიცავს მათ. მან სასამართლოში დავა მოიგო, თუმცა მერიამ გადაწყვეტილება სააპელაციოში გაასაჩივრა. ცქიტიშვილმა მერიას მორიგებაც შესთავაზა.