იუსტიციის მინისტრ თეა წულუკიანის განცხადებით, იმის მიუხედავად, რომ სავალდებულო კვოტირება მაჟორიტარებს არ ეხება, შესაძლებელი იყო, ქართულ ოცნებას დაესახელებინა მეტი ქალი. ამის შესახებ მან საზოგადოებრივი მაუწყებლის ეთერში ისაუბრა.

"რა თქმა უნდა, ვალდებულების მიუხედავად შესაძლებელი იყო, რომ ყოფილიყო მეტი ქალი, მაგრამ არ იყო. იყო ერთი ქალი, რომელიც ყველაზე მეტს იღიმოდა და ყველაზე მეტად იყო მოწადინებული. სახეზე ეტყობოდა, რომ ხვალვე გაიმარჯვებს არჩევნებში", — თქვა მინისტრმა.

მან ასევე აღნიშნა, რომ არაუშავს, თუკი "კაცები ცოტა მეტს იწვალებენ ერთხელ მაინც", რადგან მაჟორიტარული ოლქის მოგება ძალიან ძნელია.

"მე ცოტა ამას ირონიულად ვუყურებ [მაჟორიტარობის კანდიდატად კაცების დასახელებას] და ვფიქრობ რომ არაუშავს, თუკი კაცები ცოტა უფრო მეტს იწვალებენ ერთხელ მაინც, ვიდრე ქალები ვწვალობთ ხოლმე და წავლენ და ველზე იბრძოლებენ. მაჟორიტარული ოლქის მოგება არის ძალიან ძნელი", — თქვა მან.

თეა წულუკიანმა სავალდებულო კვოტირებაზეც ისაუბრა და აღნიშნა, რომ "შვებით" გახდა მოწმე, სწორედ მისმა პარტიამ რომ მისცა ხმა ასეთ "ფუნდამენტურ საარჩევნო ცვლილებას".

"ამას ბევრი უყურებს, როგორც ქალის შეურაცხყოფას, ზოგი დასცინის, ზოგი აკრიტიკებს, მაგრამ მე, როგორც ამ ქვეყნის ერთი მოქალაქე, ქალი, ვთვლი, რომ ეს არის დიდი ნაბიჯი იმისკენ, რომ იმ ახალგაზრდებმა, ვინც ახლა ამთავრებს უმაღლეს სასწავლებენს ან სულაც არ სწავლობს უმაღლეს სასწავლებელში და პროფესიას ეუფლება და შრომის სურვილი აქვს პოლიტიკურ ასპარეზზე და არის ქალი, მათ შევუწყოთ ხელი და თუ თქვენ არ გეწყინებათ, ვიტყვი, რომ ვაიძულოთ კაცები, იფიქრონ ქალებზე. პოლიტიკაში, თორემ ისე ქართველი კაცები ხშირად ფიქრობენ ქალებზე და ამ მხრივ პრობლემა არ აქვთ, მაგრამ როცა პოლიტიკაზე მიდგება საქმე, შემდეგ მარტო საკუთარი ახსოვთ ხოლმე. ეს ეხება ყველა პარტიას სხვათაშორის", — თქვა წულუკიანმა.

მინისტრმა ასევე აღნიშნა, რომ მას არ სჭირდება კვოტირება, მაგრამ უნდა "ვიფიქროთ ახალგაზრდა ქალებზე".

"ეს ყველას გვაიძულებს, რომ ჩემი ასაკის ქალებმა, რომელსაც ეს არ სჭირდება უბრალოდ, მე არ მჭირდება კვოტირება, კეთილი ვინებოთ და ვიფიქროთ ახალგაზრდა ქალებზე და არ ვიყოთ დაავადებული ავტობუსის სინდრომით, რომ მე ავედი და სხვა აღარ უნდა ამოვიდეს, ადგილი აღარ არის. შენ თუ ახვედი ავტობუსში, ჩამოსვლაც უნდა ისწავლო და სხვა აატარო", — თქვა წულუკიანმა.

ქართულმა ოცნებამ მაჟორიტარობის 30 კანდიდატს შორის მხოლოდ ერთი ქალი დაასახელა. ამასთან, ნინო ლაცაბიძის წარდგენისას ირაკლი კობახიძემ თქვა, რომ ის ყველაფერს "წარმატებით უთავსებს 4 შვილის დედობას".

-დაახლოებით 2 კვირის წინ, 2 ივლისს პარლამენტმა დაამტკიცა ცვლილებები საარჩევნო კოდექსში, რომელიც გენდერულ კვოტებსაც ითვალისწინებს. ჩანაწერი პოლიტიკურ სუბიექტებს ავალდებულებს, პარტიულ საარჩევნო სიაში ყოველ მეოთხე კანდიდატად განსხვავებული სქესის წარმომადგენელი მიუთითოს. ეს წესი მომდევნო წლების არჩევნებზე ქალთა წარმომადგენლობის ეტაპობრივ ზრდას ითვალისწინებს. მმართველ პარტიას პროპორციული სია ჯერ არ წარუდგენია, თუმცა იქ ქალების ჩასმა მოუწევს, განსხვავებით მაჟორიტარებისგან, სადაც მსგავსი ვალდებულება კანონით არ არის.