ბოლო დღეებში 6 წლის ბრიჯერ უოლკერი ნამდვილი ვარსკვლავი გახდა — დაუჯერებელი სიმამაცის გამოვლენის შემდეგ ის კრის ევანსმაც კი შეაქო და კაპიტანი ამერიკის ფარი აჩუქა. თუმცა ყველაფერი ამით არ დასრულებულა: ბრიჯერის გმირობის შესახებ სხვა შურისმაძიებლებმაც გაიგეს.

ბრიჯერის დეიდა ინსტაგრამზე ახალ ვიდეოს ავრცელებს, რომელშიც რკინის კაცის როლის შემსრულებელი, რობერტ დაუნი უმცროსი დის გადარჩენის გამო 6 წლის სუპერგმირს აქებს:

"უკვე ნამდვილი როკსტარი ხარ. გავიგე, რომ კაპიტანმა ამერიკამ თავისი ფარი გამოგიგზავნა. ვაპირებ, მე უკეთესი რამ გაჩუქო: შემდეგ დაბადების დღეზე დამირეკე, შენთვის განსაკუთრებული რამ მაქვს", — ამბობს მსახიობი ვიდეოში.

რკინის კაცს ადამიანი-ობობაც შეურთდა:

"მინდა, გითხრა, რომ საოცრად მამაცი ხარ. ჩვენ ყველანი შენით ვამაყობთ და შენს უმცროს დას ძალიან გაუმართლა, გვერდით შენნაირი ძმა რომ ჰყავს".

კომიქსის გმირ ადამიანი-ობობას როლის შემსრულებელმა, ტომ ჰოლანდმა ბრიჯერ უოლკერი ამის გამო ადამიანი-ობობას შემდეგი ფილმის გადაღებებზე დასასწრებად დაპატიჟა:

"ადამიანი-ობობა 3-ის გადაღებებს ვიწყებთ და თუ გენდომება გადასაღებ მოედანზე მოსვლა და ამ სუპერგმირის ფორმის ახლოს ნახვა, ყოველთვის გაგვიხარდება შენი ხილვა", — ამბობს ჰოლანდი ვიდეოში.

აღსანიშნავია, რომ ბრიჯერს ხშირად აცვია სწორედ ადამიანი-ობობას ფორმა.

ბრიჯერის ისტორია მთელ მსოფლიოს მისმა დეიდამ, ნიკოლ უოლკერმა მოუთხრო ინსტაგრამზე გამოქვეყნებული პოსტით, თუ როგორ გადაარჩინა მან თავისი უმცროსი და:

"მას შემდეგაც კი, რაც ძაღლმა მას სახეზე არაერთხელ უკბინა, თავის დას ხელი ჩაავლო და გაიქცა, რათა უსაფრთხო ადგილას გაეყვანა. მოგვიანებით გვითხრა: "თუ ვინმე უნდა მომკვდარიყო, ვფიქრობ, ეს მე უნდა ვყოფილიყავი". პლასტიკური ოპერაციის შემდეგ მას სახეზე 90 ნაკერი დაადეს და ახლა სახლში გადის რეაბილიტაციას. ჩვენ ძალიან გვიყვარს ჩვენი მამაცი ბიჭი და გვინდა, სხვა სუპერგმირებმაც იცოდნენ მის შესახებ", — ვკითხულობთ პოსტში.

სწორედ ამის შემდეგ ამ ფაქტს არაერთი ვარსკვლავი გამოეხმაურა, მათ შორის ერთ-ერთი პირველი კრის ევანსი იყო, რომელმაც 6 წლის ბიჭს გამოჩენილი სიმამაცის გამო კაპიტანი ამერიკის ფარი აჩუქა.