კომიქსის სამყაროს ერთ-ერთი ყველაზე ძლევამოსილი სუპერგმირის — კაპიტანი ამერიკის როლის შემსრულებელმა, კრის ევანსმა 6 წლის ბრიჯერ უოლკერს, რომელმაც თავისი უმცროსი და ძაღლის თავდასხმისგან დაიცვა, კაპიტანი ამერიკის ფარი გაუგზავნა.

"დარწმუნებული ვარ, ბოლო დღეების განმავლობაში ეს ბევრჯერ მოისმინე, მაგრამ მეც კიდევ ერთხელ გაგიმეორებ: შენ გმირი ხარ. რაც შენ გააკეთე, ეს საოცრად მამაცი, კეთილშობილური საქციელი იყო და შენს დას გაუმართლა, შენნაირი უფროსი ძმა რომ ჰყავს. მშობლებმა შენით უნდა იამაყონ", — ეუბნება ეს ცნობილი მსახიობი სპეციალურად მისთვის ჩაწერილ ვიდეოში 6 წლის გმირს.

View this post on Instagram

There are no words. We are so, so thankful.

A post shared by Nikki Walker (@nicolenoelwalker) on

ბრიჯერის ისტორია მთელ მსოფლიოს მისმა დეიდამ, ნიკოლ უოლკერმა მოუთხრო ინსტაგრამზე გამოქვეყნებული პოსტით, თუ როგორ გადაარჩინა მან თავისი უმცროსი და:

"მას შემდეგაც კი, რაც ძაღლმა მას სახეზე არაერთხელ უკბინა, თავის დას ხელი ჩაავლო და გაიქცა, რათა უსაფრთხო ადგილას გაეყვანა. მოგვიანებით გვითხრა: "თუ ვინმე უნდა მომკვდარიყო, ვფიქრობ, ეს მე უნდა ვყოფილიყავი". პლასტიკური ოპერაციის შემდეგ მას სახეზე 90 ნაკერი დაადეს და ახლა სახლში გადის რეაბილიტაციას. ჩვენ ძალიან გვიყვარს ჩვენი მამაცი ბიჭი და გვინდა, სხვა სუპერგმირებმაც იცოდნენ მის შესახებ", — ვკითხულობთ პოსტში.

სწორედ ამის შემდეგ გამოეხმაურა ამ ფაქტს არაერთი ცნობილი ადამიანი, მათ შორის კრის ევანსი, რომელმაც განსაკუთრებულ სიურპრიზთან ერთად 6 წლის გმირი დაამშვიდა, რომ მალე ყველაფერი უკეთ იქნება:

"სულ ასეთი მამაცი იყავი, შენნაირი ადამიანები გვჭირდება. ვიცი, რომ გამოჯანმრთელების პროცესი შეიძლება რთული იყოს, მაგრამ მას შემდეგ, რაც შენზე გავიგე, ვფიქრობ, ეს სულაც არ გაგიჭირდება".

კრის ევანსთან ერთად ბრიჯერ უოლკერის ამ საოცრად მამაც საქციელს ისეთი ცნობილი მსახიობებიც გამოეხმაურნენ სოციალურ ქსელებში, როგორებიც არიან ბრი ლარსონი, მარკ რუფალო და კრის ჰემსვორტი.