მსოფლიოში ცნობილმა გიგანტურმა სტრიმინგ სერვისმა ნეტფლიქსმა თავისი წარმოებული ფილმების ის ათეული გამოაქვეყნა, რომლებიც მისი სერვისების მომხმარებლებში განსაკუთრებული პოპულარობით სარგებლობს.

ნეტფლიქსმა ფილმების მსგავსი რეიტინგი პირველად გაგვიზიარა საჯაროდ და მასში ის კინოსურათები მოხვდნენ, რომლებიც პრემიერიდან პირველი ოთხი კვირის განმავლობაში ყველაზე მეტმა მაყურებელმა ნახა.

სიის სათავეში სულ ცოტა ხნის წინ გამოსული Extraction აღმოჩნდა, რომელშიც მთავარ როლს კრის ჰემსვორტი ასრულებს: ფილმმა 99 მილიონი ნახვა დააგროვა. ამ მძაფრსიუჟეტიან თრილერს 11 მილიონი ნახვით ჩამორჩება 2018 წლის სამეცნიერო ფანტასტიკა Bird Box და სიაში მეორე ადგილს იკავებს.

სრული ათეული ასე გამოიყურება:

  1. Extraction — 99 მილიონი ნახვა
  2. Bird Box — 89 მილიონი ნახვა
  3. Spenser Confidential — 85 მილიონი ნახვა
  4. 6 Underground — 83 მილიონი ნახვა
  5. Murder Mystery — 73 მილიონი ნახვა
  6. The Irishman — 64 მილიონი ნახვა
  7. Triple Frontier — 63 მილიონი ნახვა
  8. The Wrong Missy — 59 მილიონი ნახვა
  9. The Platform — 56 მილიონი ნახვა
  10. The Perfect Date — 48 მილიონი ნახვა

აღსანიშნავია, რომ სიაში მოხვდა ისეთი საკულტო რეჟისორის ფილმი, როგორიცაა მარტინ სკორსეზე: გასულ წელს გამოსულმა The Irishman-მა არა მარტო ნეტფლიქსის მომხმარებლების, არამედ ამერიკის კინოაკადემიის ყურადღებაც მიიქცია და 10 ოსკარის ნომინაცია მოიპოვა.

ასევე საინტერესოა, რომ მეცხრე ადგილზე აღმოჩნდა ესპანურენოვანი საშინელებათა ჟანრის ფილმი The Platform, რომელიც დაძაბული სიუჟეტითა და ძალადობის კადრების შეულამაზებელი აღწერით სოციალური უთანასწორობის პრობლემებს გადმოგვცემს.

გასათვალისწინებელია, რომ ნეტფლიქსი ნახვების სტატისტიკას ახალი მეთოდით ითვლის: საკმარისია, მომხმარებელმა ფილმის ორ წუთს მაინც უყუროს, რომ ის სტატისტიკაში აისახება. შესაბამისად, ეს სულაც არ ნიშნავს იმას, რომ ამდენმა მაყურებელმა ეს დასახელებული ფილმები თავიდან ბოლომდე სრულად ნახა.