რეგიონული განვითარებისა და ინფრასტრუქტურის მინისტრის ინფორმაციით, რუსთავის მაგისტრალის ნაწილზე სამუშაოები გრძელდება, თუმცა შეჩერებულია ერთკილომეტრიანი მონაკვეთი, სადაც ადგილობრივ მოსახლეობასთან დავა მიმდინარეობს.

"რუსთავის მაგისტრალზე ჩვენ გვაქვს შეჩერებული მხოლოდ ერთ მონაკვეთზე სამუშოები, სადაც სამწუხაროდ, ადგილობრივი მოსახლეობის მხრიდან მოხდა საკმაოდ აქტიური პროტესტის გამოხატვა იმ სამუშაოებთან დაკავშირებით, რომელიც იქ მიმდინარეობდა, მიუხედავად იმისა, რომ რეალურად, გზის გაყვანა არ უქმნიდა მათ საფრთხეს, მაგრამ სამწუხაროდ, ამის გამო ჩვენ ძალისმიერი მეთოდებით ვერ ვაიძულებთ მოსახლეობას და მხოლოდ მათთან შეთანხმებით იქნება შესაძლებელი გზის გაყვანა", — თქვა ცქიტიშვილმა.

მინისტრმა აღნიშნა, რომ სხვა მონაკვეთებზე სამუშაოები გრძელდება, ასევე, არსებობს უკვე დასრულებული მონაკვეთები, რომლებითაც უკვე ვსარგებლობთ. ცქიტიშვილის განცხადებით, შეფერხებულ მონაკვეთებზე სამუშაოები აღდგება მას შემდეგ, რაც მოსახლეობასთან შეთანხმებას მიაღწევენ. თუმცა მინისტრს არ დაუკონკრეტებია, შესაძლებელია თუ არა ეს შეთანხმება.