ესპანეთის მთავრობა ევროკავშირის მიერ რეკომენდირებულ "ეპიდემიოლოგიურად უსაფრთხო" 15 ქვეყნიდან მხოლოდ 13-ს, მათ შორის, საქართველოს უხსნის საზღვარს. ამის შესახებ ინფორმაციას Schengenvisainfo News ავრცელებს. ჩინეთი და მაროკო, შესაძლოა, ესპანეთის სიის მიღმა დარჩეს, მიუხედავად იმისა, რომ ეს ორი ქვეყანა ევროკავშირის საბჭომ "ეპიდემიოლოგიურად უსაფრთხოდ" მიიჩნია.

საქართველოს გარდა, ესპანეთის საზღვრები გაიხსნება ალჟირის, ავსტრალიის, კანადის, იაპონიის, მონტენეგროს, ახალი ზელანდიის, რუანდას, სერბეთის, სამხრეთ კორეის, ტაილანდის, ტუნისისა და ურუგვაის მოქალაქეებისთვის.

მთავრობის პრესსპიკერის, მარია ჯესუსის თქმით, საზღვრები გაიხსნება მაშინ, როდესაც აღნიშნული ქვეყნებიც დაუშვებენ მოგზაურებს მათ ტერიტორიაზე. ესპანეთი მაროკოსთან საზღვრის ჩაკეტვას 10 ივლისამდე გეგმავს, ხოლო ჩინეთთან იმ პირობით გახსნის, თუკი ისინიც გახსნიან ქვეყანას ევროკავშირის მოქალაქეებისთვის.

30 ივნისს ევროკავშირის საბჭომ გამოაქვეყნა იმ 15 "უსაფრთხო" ქვეყნის სია, რომელთანაც პირველი ივლისიდან მოგზაურობას აახლებს. მათ შორის მოხვდა საქართველოც.

მოგზაურთა დასაშვებად, მესამე ქვეყნებისთვის განმსაზღვრელია ეპიდემიოლოგიური მდგომარეობა და უსაფრთხოების ზომები, როგორიცაა, ფიზიკური დისტანცია და ეკონომიკური და სოციალური მოსაზრებები. საბჭოს განცხადებით, ეპიდემიოლოგიური სიტუაციის თვალსაზრისით, მესამე ქვეყნები შემდეგ კრიტერიუმებს უნდა აკმაყოფილებდნენ:

  • კორონავირუსის ახალი შემთხვევები 14 დღის განმავლობაში 100 000 ადამიანზე ევროპის საშუალო მონაცემებთან ახლოს ან ქვემოთ (2020 წლის 15 ივნისის მდგომარეობით);
  • ახალი შემთხვევების სტაბილური ან კლებადი ტენდენცია აღნიშნულ პერიოდში, წინა 14 დღესთან შედარებით;
  • ზოგადი პასუხი COVID-19-თან, სადაც მხედველობაში მიიღება ტესტირება, დაკვირვება, კონტაქტების მოძიება, მკურნალობა და ინფორმაციის სანდოობა. ასევე, საჭიროების შემთხვევაში ჯანდაცვის საერთაშორისო რეგულირების საშუალო ქულა.

ჩეხეთი ევროკავშირის საბჭოს მიერ შეთავაზებული ქვეყნებიდან მხოლოდ რვას გაუხსნის საზღვარს. მათ სიაში ვერ მოხვდა საქართველო. საქართველოსთან ერთად შეხეთმა სიიდან ამოიღო ალჟირი, მაროკო, რუანდა, ტუნისი, ურუგვაი და ჩინეთი.