ქართული ოცნების დეპუტატი, ირაკლი სესიაშვილი პრემიერ გახარიას მიმართ ოპოზიციის მიერ 20 ივნისზე დასმულ კითხვას გამოეხმაურა და განაცხადა, რომ მათ "პოლიტიკური ამნეზია" აქვთ. სესიაშვილმა აღნიშნა ისიც, რომ 20 ივნისის მოვლენების გამო "წუხს".

"მეც მახსოვს 20 ივნისი, მიმაჩნია რომ ჩვენი ქვეყნის თანამედროვე ისტორიაში ეს არის ძალიან მძიმე დღე. ვწუხვარ რადგან ჩვენმა თანამოქალაქეებმა მიიღეს მძიმე ფიზიკური დაზიანება. ასევე, ძალიან ვწუხვარ რომ არსებობენ თქვენნაირი პოლიტიკოსები, რომლებიც ფიქრობენ, რომ ამ ქვეყანაში დასაშვებია 3 საათის განმავლობაში პოლიციელებს რკინებს ურტყამდნენ, რიგებიდან გამოგვყავდეს, ბრბოში ცემდე, და დასაშვებია თურმე თქვენნაირი პოლიტიკოსებისათვის, რომ შტურმით შემოხვიდე და ამ ქვეყანაში პოლიტიკური გარემო შეცვალო.

მე მესმის, რომ თქვენ პოლიტიკური ამნეზია გაქვთ და 20 ივნისის უკან ვერ იყურებით. თუ გინდათ რომ ამ ამნეზიაზე იმკურნალოთ, იქ ნათელაშვილის ფანჩატურში რომ იკრიბებით, თქვენს პოლიტიკურ პარტნიორებს ჰკითხეთ და მოგიყვებიან ამბებს საგმირონისა თქვენი პოლიტიკური წარსულის. მე მინდა 20 ივნისი დაიმახსოვროთ და თუ თქვენ გაქვთ ამ ქვეყანაში რაიმე პოლიტიკური პასუხისმგებლობა, ძალადობით, რევოლუციური გზებით შეჭრა შემოჭრა არ გაგივათ".

მანამდე, ევროპული საქართველოს დეპუტატმა, ოთო კახიძემ პრემიერს გიორგი გახარიას მიმართა და ჰკითხა, რატომ გამოტოვა 20 ივნისის მოვლენები წლიური ანგარიშიდან და რატომ არ გრძნობს პასუხისმგებლობას ამ დღეზე.