პარლამენტის თავმჯდომარე, არჩილ თალაკვაძე სამწუხაროს უწოდებს იმას, რომ "უპასუხისმგებლო სიუჟეტისთვის" ჟურნალისტს სისხლისსამართლებრივი ან ადმნისტრაციული პასუხისმგებლობა ვერ დაეკისრება. შალვა რამიშვილის გადაცემაში პარლამენტის თავმჯდომარემ მთავარი არხის ეთერში გასული ბავშვთა პორნოგრაფიის საქმეზე გაკეთებული სიუჟეტი განიხილა, რომლის გამოც არხმა მოგვიანებით ბოდიში მოიხადა.

"სამწუხაროდ, ჩვენ არ გვაქვს ისეთი რეგულაციები, რომლითაც შეიძლება გარკვეული სისხლისსამართლებრივი პასუხისმგებლობა თუ ადმინისტრაციული პასუხისმგებლობა დააკისრო ასეთი სიუჟეტების და ასეთი უპასუხისმგებლო სიუჟეტების ავტორებს. გვაქვს რეგულაციები, სადაც გარკვეული დავები შეგიძლია წარმართო, მაგრამ საერთო ჯამში, საქართველოს აქვს დემოკრატიული, თავისუფალი სტანდარტი.

ეს კანონმდებლობა, ეს სტანდარტი, რომელიც ჩვენ გვაქვს, არის სასარგებლო, როდესაც შენ გაქვს ჯანსაღი სპექტრი მედიასაშუალებების, როდესაც მედიასაშუალებები წესების დაცვით თამაშობენ. მაგრამ, მეორეს მხრივ, როდესაც მედიასაშუალებები არიან პოლიტიკური პარტიების ზოგჯერ ზონდერები, ზოგჯერ დანამატები და ზოგჯერ უბრალოდ ხელები, ამ შემთხვევაში, რა საკვირველია, თავისუფლების, დემოკრატიის ნებისმიერი სიკეთე შეიძლება იყოს ბოროტად გამოყენებული", — აღნიშნა თალაკვაძემ.

POSTV-ის ეთერში, არჩილ თალაკვაძემ მედიაში გავრცელებულ ფეიქნიუსებზე ისაუბრა. საუბარი მმართველი გუნდის მიმართ ოპოზიციურად განწყობილ ტელევიზიებს შეეხო. ამასთან, ე.წ. ყალბ ამბებზე ამავე საღამოს ფეისბუქზე ჩართვა ჰქონდა მმართველი გუნდის კიდევ ერთ წარმომადგენელს, თბილისის მერს, კახა კალაძეს.

დღეს, 25 ივნისს დეპუტატები პარლამენტში აქტიურად საუბრობდნენ ფეიქნიუსზე და მაგალითად მთავარი არხი მოჰყავდათ.