უკრაინის პრეზიდენტის, ვოლოდიმირ ზელენსკის თქმით, მან საქართველოს ყოფილ პრეზიდენტ მიხეილ სააკაშვილს თავდაპირველად რეფორმების საკითხებში მისი მრჩევლობა შესთავაზა, თუმცა მან უთხრა, რომ "ეს მისი დონე არაა". ამის შესახებ პრეზიდინეტმა უკრაინსკაია პრავდასთან ინტერვიუს დროს ისაუბრა.

გარდა ამისა, ზელენსკი ამბობს, რომ სააკაშვილის ვიცე-პრემიერობას პარლამენტში ხალხის მსახურის ფრაქციამ არ დაუჭირა მხარი. ამასთან, პრეზიდენტი აღნიშნავს, რომ მთავრობაში თანამდებობა სააკაშვილმა თვითონ შესთავაზა.

სააკაშვილის სიტყვებით, თქვენ მას ვიცე-პრემიერის თანამდებობა შესთავაზეთ. რატომ ჩათვალეთ, რომ სააკაშვილს ვიცე-პრემიერობა შეეძლო?

არა, შეხედეთ. ჩვენ შევხვდით მიხეილ სააკაშვილს, მან თქვა: "მინდა, დაგეხმაროთ". რამდენიმე შეხვედრა იყო, რამდენჯერმე მოვიდა სხვადასხვა ადეკვატური იდეით.

მან იკითხა: "სად მხედავთ?" ვუთხარი: "მინდა, რომ თქვენ თვითონ დაფიქრდეთ და თვითონ დაინახოთ თქვენი სტატუსი". მე მას შევთავაზე: "შეგიძლიათ ჩემთან რეფორმების საკითხებში მრჩეველი გახდეთ". მან მითხრა: "ეს ჩემი დონე არაა".

მაშინ ვკითხე, სად ხედავდა საკუთარ თავს. მან მითხრა: "მგონია, რომ მთავრობაში რეფორმებით შემიძლია დავკავდე, რეფორმების საკითხებში ვიცე-პრემიერი გავხდე". მე მას ვუპასუხე: "იყოს ვიცე-პრემიერი, მაგრამ პრემიერმინისტრს უნდა გავესაუბრო, როგორ იქნება ეს და როგორ შეძლებთ მუშაობას".

პრეზიდენტი ზელენსკი ამბობს, რომ პასპორტი სააკაშვილს დაუბრუნა, რადგან თავის დროზე ის უსამართლოდ წაართვეს. გარდა ამისა, ზელენსკის ჰკითხეს მისი წინამორბედის, პეტრო პოროშენკოსა და მიხეილ სააკაშვილის ურთიერთობაზე.

დღეს სააკაშვილს ოფიციალური თანამდებობა აქვს. პოროშენკოს დროს ოდესის გუბერნატორი იყო, როცა ერთმანეთს მეგობრებს უწოდებდნენ. არ გეშინიათ, რომ თუ თქვენი რეიტინგის დაცემა დაიწყება, სააკაშვილი თქვენ წინააღმდეგ ბრძოლას დაიწყებს?

ჩემთვის ადვილია — ის ჩემი მეგობარი არასდროს ყოფილა. მას რეფორმების კეთება სურს — ძალიან კარგი. მას და ყველა ჩვენგანს წარმატებას ვუსურვებ. მიმაჩნია, რომ მას არ შეუძლია ჩემამდე, ასე რომ ვთქვათ... თუმცა ყველაფერი შესაძლებელია. შეიძლება, მართალიც ხართ.

მიხეილ სააკაშვილი უკრაინის რეფორმების აღმასრულებელი კომიტეტის თავმჯდომარედ 7 მაისს დაინიშნა. გადაწყვეტილებას ხელი პრეზიდენტმა მოაწერა.

22 აპრილს მიხეილ სააკაშვილმა განაცხადა, რომ უკრაინის პრეზიდენტმა ვოლოდიმირ ზელენსკიმ მას რეფორმების საკითხებში ვიცე-პრემიერის პოსტი შესთავაზა. ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.

რეფორმების ეროვნული საბჭო 2014 წელს მაშინდელი პრეზიდენტის, პეტრო პოროშენკოს ბრძანებით შეიქმნა. საბჭოს წევრებს პერსონალურად უკრაინის პრეზიდენტი ნიშნავს. დოიჩე ველეს ინფორმაციით, 2014-2018 წლებში საბჭომ სულ 28 სხდომა ჩაატარა. ბოლო სხდომა კი 2018 წლის მარტში გაიმართა.

პეტრო პოროშენკოს პრეზიდენტობის დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პრეზიდენტის ბრძანებით, ის რეადმისიით პოლონეთში დააბრუნეს. საპრეზიდენტო არჩევნებში გამარჯვების შემდეგ, ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგაც ის უკრაინაში დაბრუნდა.