პარასკევს ოტავაში, პარლამენტის შენობასთან, რასიზმის წინააღმდეგ გამართულ აქციაზე პრემიერმა ჯასტინ ტრუდომ სოლიდარობის ნიშნად დაიჩოქა. ამის შესახებ ინფორმაციას CNN ავრცელებს.

კანადაში აქცია "Black Lives Matter" ამერიკაში, ჯორჯ ფლოიდის მკვლელობას ეხმაურება, ის რასიზმისა და პოლიციელების მხრიდან ძალადობის საწინააღმდეგოდ იმართება. ტრუდომ დღის განმვლობაში კომენტარი არ გააკეთა იმასთან დაკავშირებით, შეუერთდებოდა თუ არა აქციის მონაწილეებს. მოგვიანებით კი პარლამენტის შენობასთან შავი ნიღბით მივიდა.

პრემიერს აქციაზე არ უსაუბრია, ხოლო მას შემდეგ, რაც მოწოდება იყო, რომ ყველას მუხლი მოეყარა, ისიც ასე მოიქცა.

აქციები ამერიკაში და სხვა ქვეყნებში მინეაპოლისში პოლიციელის მხრიდან დაკავებისას ძალის გამოყენების დროს აფრო-ამერიკელი ჯორჯ ფლოიდის გარდაცვალებას მოჰყვა. გავრცელებულ ვიდეოებში ჩანს, რომ პოლიციელი დერეკ შოვინი 8 წუთის განმავლობაში ფლოიდს კისერზე ფეხს აჭერდა, დაკავებული ამბობდა, რომ ვერ სუნთქავდა. ექსპერტიზამ დაადასტურა, რომ ჯორჯ ფლოიდის გარდაცვალების მიზეზი ჟანგბადის ნაკლებობა გახდა.

აღნიშნული შემთხვევიდან მალევე დერეკ შოვინი და კიდევ სამი პოლიციელი სამსახურიდან გაათავისუფლეს. რამდენიმე დღეში კი შოვინი ფლოიდის მკვლელობის ბრალდებით დააკავეს.

მიუხედავად იმისა, რომ ამერიკის 40 ქალაქში კომენდანტის საათი გამოაცხადეს, დემონსტრანტები შეზღუდვას არ ითვალისწინებენ. ნიუ-იორკში, ჩოკაგოში, ფილადელფიასა და ლოს-ანჯელესში აქციის მონაწილეების წინააღმდეგ პოლიციამ ცრემლსადენი გაზი და წიწაკის ტყვიები გამოიყენა. რამდენიმე ქალაქში აქციის მონაწილეებმა პოლიციის მანქანები და მაღაზიები გადაწვეს.