საერთაშორისო ორგანიზაციების მიერ ავტორიტარულად შეფასებული ირანის საგარეო საქმეთა სამინისტრო აშშ-ს მთავრობას მოუწოდებს, რომ საკუთარ ხალხზე "ძალადობა შეწყვიტოს". ამის შესახებ ინფორმაციას Aljazeera ავრცელებს.

როგორც ირანის საგარეო საქმეთა სამინისტროს სპიკერი, აბას მოუსავი ამბობს, აშშ-ს მაღალჩინოსნებმა და სამართალდამცავებმა ხალხს "სუნთქვის საშუალება" უნდა მისცენ.

"მივმართავ ამერიკელ ხალხს, მსოფლიოს ესმის თქვენი პროტესტი მთავრობის მხრიდან ჩაგვრის წინააღმდეგ. მსოფლიო თქვენს გვერდით დგას", — აცხადებს ირანის საგარეო უწყების სპიკერი.

მან ასევე აღნიშნა, რომ აშშ ირანის მტერია, რომელიც ძალადობასა და ჩაგვრას, როგორც ქვეყნის შიგნით, ისე მის გარეთ, ახორციელებს.

აშშ-ში უკვე რამდენიმე დღეა აფროამერიკელი ჯორჯ ფლოიდის სიკვდილს აპროტესტებენ, რომელიც დაკავების დროს პოლიციელის გულგრილობისა და არაადამიანური ქმედებების გამო დაიღუპა. მიუხედავად იმისა, რომ ათეულობით ქქალაქში კომენდანტის საათი გამოაცხადეს, დემონსტრანტები შეზღუდვას არ ითვალისწინებენ.

ნიუ-იორკში, ჩიკაგოში, ფილადელფიასა და ლოს-ანჯელესში აქციის მონაწილეების წინააღმდეგ პოლიციამ ცრემლსადენი გაზი და წიწაკის ტყვიები გამოიყენა. რამდენიმე ქალაქში აქციის მონაწილეებმა პოლიციის მანქანები და მაღაზიები გადაწვეს.

ეროვნული გვარდია ვაშინგტონსა და რამდენიმე შტატში გაააქტიურეს. პირველი ივნისის ღამეს თეთრი სახლის ირგვლივ დემონსტრანტებმა კოცონები დაანთეს და პოლიციას ქვებს ესროდნენ.

როგორც Aljazeera წერს, ირანულ მედიაში, განსაკუთრებით კი სახელმწიფო მედიაში, აშშ-ში მიმდინარე აქციები ინტერპრეტირებულა შუქდება და აშშ-ს ინსტიტუციონალურ რასიზმში ადანაშაულებენ.