ბოლო დღეების განმავლობაში აშშ-ში შავკანიანი მოქალაქის, ჯორჯ ფლოიდის დაკავებისას გარდაცვალების გამო მასობრივი საპროტესტო აქციები იმართება, რასაც ცნობილი რეჟისორი, სპაიკ ლიც თავისი ახალი მოკლემეტრაჟიანი ფილმით გამოეხმაურა.

წუთნახევრიან ვიდეოში სამი სხვადასხვა კადრებია ერთმანეთთან დაკავშირებული: ერთი სცენა თავად სპაიკ ლის ფილმიდანაა Do the Right Thing, დანარჩენი ორი კი რეალურ — სხვადასხვა დროს დაპატიმრებისას ჯორჯ ფლოიდისა და ერიკ გარნერის გარდაცვალების კადრებს ასახავს.

გაფრთხილება: ვიდეო შეიცავს ემოციურად მძიმე და დამთრგუნველ კადრებს.

სპაიკ ლიმ ეს მოკლემეტრაჟიანი ფილმი, რომელსაც სამი ძმა ეწოდება, CNN-თან ჩართივს დროს გაავრცელა. ვიდეო იწყება წარწერით "ოდესმე შეწყვეტს ისტორია გამეორებას?" და 1989 წელს გამოსულ ფილმში Do the Right Thing პერსონაჟ რედიო რაჰიმის დაპატიმრების სცენა ჯორჯ ფლოიდისა და ერიკ გარნერის ანალოგიურ გამოცდილებასთან ერთადაა ნაჩვენები.

"როგორ არ ესმის ხალხს, თუ რატომ იქცევიან ადამიანები ისე, როგორც იქცევიან? ეს სიახლე არ არის, ჩვენ გვინახავს აჯანყებები 60-იან წლებში, როცა მარტინ ლუთერ კინგი მოკლეს. ყოველთვის რაღაც ხდება, ჩვენ კი სამართლიანობას ვერ ვიღებთ, ამიტომაც ხალხი ისე რეაგირებს, როგორადაც მათი ხმის სხვებისთვის გაგონებას შეძლებენ. ჩვენ ამას ისევ და ისევ, მუდმივად ვხედავთ: ეს ქვეყანა შავკანიანი ადამიანების დახოცვითაა აშენებული", — განაცხადა რეჟისორმა CNN-თან საუბრისას.

სპაიკ ლის მოკლემეტრაჟიან ფილმში ნაჩვენები ერიკ გარნერის დაპატიმრების კადრები 2014 წელსაა გადაღებული და მასში მონაწილე პოლიციელები პასუხისგებაში არ მიუციათ. ჯორჯ ფლოიდი 25 მაისს გარდაიცვალა, რასაც მთელი ქვეყნის მასშტაბით საპროტესტო აქციების ტალღა მოჰყვა, დაკავებაში მონაწილე პოლიციელი კი მკვლელობის ბრალდებით დააპატიმრეს.