ქალთა ინიციატივების მხარდამჭერი ჯგუფის (WISG) ინფორმაციით, 2016 წლის 27 ნოემბრის ღამეს, გმირთა მოედნის მიმდებარე ტერიტორიაზე, ხუთ ტრანსგენდერ ქალს თავს დაესხა ორი პიროვნება, რომლებმაც ქალების ცემა სცადეს.

"ისროდნენ ქვებს და მინის ბოთლებს. ერთ-ერთი თავდამსხმელი დანის გამოყენების მუქარით გაეკიდა ორ ქალს, მაგრამ მათ გაქცევა მოახერხეს. ინციდენტის შედეგად რამდენიმე დაზარალებულმა მიიღო სხეულის მსუბუქი დაზიანება. კერძოდ, როგორც დაზარალებული ამბობს, თავდამსხმელმა მას მინის დიდი ბოთლი ესროლა, რომელიც ზურგის არეში მოხვდა" - წერია WISG-ის განცხადებაში.

ერთ-ერთი დაზარალებულის ინფორმაციით, მან საპატრულო პოლიცია გამოიძახა, თუმცა სამართალდამცავების მოსვლამდე თავდამსხმელებმა მიმალვა მოასწრეს. დაზარალებულებმა საქართველოს სახალხო დამცველსაც მიმართეს ცხელ ხაზზე დახმარების თხოვნით.

WISG-ის ინფორმაციით, თავდამსხმელები ორი კაცი იყო, რომლებიც გამოიყურებოდნენ ისე, როგორც ის პირები, რომლებიც 25 ნოემბერს ტრანსგენდერ ქალს ნატას დაესხნენ თავს.

ქალთა ინიციატივების მხარდამჭერი ჯგუფი მოუწოდებს საქართველოს შინაგან საქმეთა სამინისტროს გააძლიეროს სამართალდამცავთა პატრულირება ქალაქის ისეთ წერტილებში, სადაც დანაშაულის ჩადენის ალბათობამ იმატა.

განახლება
თავდაპირველად შსს-ს პრესსამსახურში On.ge-ს განუცხადეს, რომ ამ შემთხვევაზე მათთან ინფორმაცია არ შესულა, თუმცა მოგვიანებით უწყებიდან დაგვიკავშირდნენ და გვითხრეს, რომ გმირთა მოედანზე მოხდა მსგავსი შემთხვევა, სადაც დროულად გამოცხადდა პატრულის ეპიკაჟი, თუმცა დაზარალებულებმა პატრულის თანამშრომლებთან ურთიერთობა არ ისურვეს.
პრესსამსახურის თანამშრომლის თქმით, დაზარალებული იყო მხოლოდ ერთი ტრანსგენდერი ქალი.