ლეიბორისტული პარტიის ლიდერის, შალვა ნათელაშვილის თქმით, ამერიკის სახელმწიფო მდივანსა და ფინანსთა მინისტრს ივანიშვილის წინააღმდეგ სანქციეიბს დაწესების დასაჩქარებლად მიმართა.

"მივმართე დღეს აშშ-ს სახელმწიფო მდივანს, პომპეოს და ფინანსთა მინისტრს, მნუჩინს დაჩქარდეს ბიძინა ივანიშვილის და პუტინის კლასტერის წინააღმდეგ ფინანსური, ქონებრივი სანქციების დაწესების პროცესი, რათა საარჩევნოდ გავანეიტრალოთ ეს საოკუპაციო ანექსიური ჯგუფი კრემლიდან", — თქვა შალვა ნათელაშვილმა.

ნათელაშვილის თქმით, პრემიერის განცხადება, სადაც მან საერთაშორისო პოლიტიკოსებს ანგაჟირებული ლობისტები უწოდა, დიპლომატიის ისტორიაში უპრეცედენტო შეურაცხყოფა და თავხედობაა. პრემიერმა, გიორგი გახარიამ ამ თემასთან დაკავშირებით აღნიშნა, რომ ქვეყნებს შორის სტრატეგიული ურთიერთობა პოლიტიკურად ანგაჟირებული ლობისტების წერილებით არ ყალიბდება.

ამერიკელმა სენატორებმა და კონგრესმენებმა საქართველოში ამერიკული კომპანიებისა და ბიზნესის შევიწროების გამო სახელმწიფო მდივანს, მაიკ პომპეოსა და ფინანსთა მინისტრს, სტივენ მნუჩინს წერილით მიმართეს. წერილის ავტორები სენატორები ტედ კრუზი და ჯონ კორნინი, ასევე, კონგრესმენები ჯოდი არინგტონი და მარკვეინ მალინი არიან.

კანონმდებლები აღნიშნავენ, რომ საქართველოში მუშაობაში ხელი შეეშალა კომპანია ფრონტერას და მას ფაქტობრივად გაძევებით ემუქრებიან. მათივე თქმით, იმავე პრობლემას წააწყდა Conti Group ანაკლიის პორტთან დაკავშირებით, რამაც პროექტის შეფერხება გამოიწვია.

ამასთან, სენატორები აცხადებენ, ქართული ბიზნესები და ფინანსური სისტემა, უკვე წლებია (2013 წლიდან), გვერდს უვლის ამერიკულ სანქციებს ირანთან დაკავშირებით.

გაიგეთ მეტი: