"რუსეთისაგან და ტერორისტული დაჯგუფებებისაგან გაიზარდა პროპაგანდისტული ზეწოლა ევროკავშირზე", - ამის შესახებ დღეს, 23 ნოემბერს ევროპარლამენტარებმა რეზოლუციას უყარეს კენჭი. მათი განცხადებით, პროპაგანდა ამახინჯებს სიმართლეს, იწვევს ეჭვებს და შლის ევროკავშირს.

ევროპარლამენტარები მიიჩნევენ, რომ ანტი-ევროპული კამპანიის საწინააღმდეგოდ, ევროკავშირის "სტრატეგიული კომუნიკაციები" უნდა გაძლიერდეს, რაც მეტი ინვესტიციის ჩადებას გულისხმობს ცნობიერების ამაღლების, განათლების, ონლაინ და ადგილობრივი მედიის, საგამოძიებო ჟურნალისტისკის და ინფორმირებულობის კუთხით.

რეზოლუციის თანახმად, ევროკავშირს სჭირდება დეზინფორმაციის გავრცელების საწინააღმდეგო კამპანია.

ევროპარლამენტარები აცხადებენ, რომ კრემლმა მას შემდეგ წამოიწყო პროპაგანდა ევროკავშირის წინააღმდეგ, რაც ყირიმის ანექსია მოახდინა და დონბასში ჰიბრიდული ომი წამოიწყო. მათივე თქმით, რუსეთი პროპაგანდისთვის იყენებს ინსტრუმენტების ფართო სპექტრს, როგორიცაა მრავალენოვანი ტელევიზიები, მაგალითად, Russia Today, ფსევდო საინფორმაციო სააგენტოები და მულტიმედია პლატფორმები, მაგალითად, Sputnik.

რეზოლუციის ტექსტის მიხედვით, კრემლი აფინანსებს პოლიტიკურ პარტიებსა და სხვა ორგანიზაციებს ევროკავშირში.

ევროპარლამენტარები მიუთითებენ იმაზეც, რომ ევროკავშირი და მისი მოქალაქეები დაეშის (ერაყისა და ლევანტის ისლამური სახელმწიფო) მთავარი სამიზნეები არიან. ისინი მოუწოდებენ თითოეულ წევრ სახელმწიფოს ერთობლივად, უფრო მჭიდროდ იმუშავონ საზოგადოების დასაცავად.