ჯანდაცვის მინისტრის მოვალეობის შემსრულებელმა დავით სერგეენკომ 2030-ის ეთერში საყოველთაო ჯანდაცვის გამოწვევებზე და უწყების გეგმებზე ისაუბრა. მისი თქმით, პროგრამის განხორციელებისას გამოიკვეთა ისეთი პრობლემა როგორიცაა სამედიცინო მოვლის ხარისხი. სერგეენკომ ხაზგასმით თქვა, რომ იგი ამით ბრალს არ სდებს ექიმებსა და ექთნებს უხარისხოდ მუშაობაში, არამედ ბიზნესის ორგანიზებაში. მისი განცხადებით კლინიკების ნაწილი მოგებას პაციენტებისა და პერსონალის ხარჯზე იღებს:

"ამ ოთხი წლის განმავლობაში გამოიკვეთნენ ისეთი კლინიკები, რომლებსაც აინტერესებთ მატერიალური მოგების მიღება და ამას პაციენტების და სამედიცინო პერსონალის ხარჯზე აკეთებენ. მათზე დაწესდება ეფექტური, ადეკვატური კონტროლი. ჩვენ გვაქვს ამისათვის შესაბამისი სამსახურები, მაგრამ ამ რეგულაციებს სჭირდება დახვეწა. ეს არის მნიშვნელოვანი გამოწვევა რომელსაც რეფორმის მასშტაბის ცვლილებები დასჭირდება".

დავით სერგეენკო გამოყოფს იმასაც რომ პაციენტები 80 პროცენტში ან მეტში, მიმართავენ პირდაპირ სტაციონარს რაც მისი შეფასებით, ალოგიკურია:

"თუკი იდეალურ ჯანდაცვის სისტემაში, აბსოლუტურ უმრავლესობაში, 80 პროცენტში პაციენტს უნდა უგვარებდეს მის პრობლემებს ოჯახის ექიმი, პირველადი ჯანდაცვა, ხდებოდეს დაავადების პრევენცია, ჩვენს შემთხვევაში ეს პირიქითაა".

ჯანდაცვის უწყების ხელმძღვნელი ასევე ფიქრობს, რომ პრობლემაა სამედიცინო მომსახურებაზე არათანაბარი ხელმისაწვდომობა:

"სოფლად და ქალაქებში რა თქმა უნდა, ვერ იქნება ერთი დონის სამედიცინო მომსახურება, მაგრამ ეს განსხვავება მნიშვნელოვანია და ადამიანებს უწევთ სხვა რეგიონში წასვლა იმისათვის, რომ მიიღოს ის დახმარება, რასაც წესით მას ოჯახის ექიმი უნდა აწვდიდეს".

რას დაპირდა ამომრჩეველს ქართული ოცნება საყოველთაო ჯანდაცვის მიმართულებით?

პარტია ქართული ოცნება არჩევნებში გამარჯვების შემთხვევაში, ჯანდაცვის კუთხით, ამომრჩეველს საყოველთაო ჯანდაცვის სისტემის შენარჩუნებას დაპირდა. მათი წინასაარჩევნო პროგრამით გათვალისწინებულია, რომ გაუმჯობესდება საყოველთაო ჯანდაცვის სერვისებისა და მედიკამენტების ხელმისაწვდომობა მოწყვლადი ჯგუფებისთვის და პენსიონერებისთვის.