ევროპასთან ინტეგრაციის კომიტეტის თავმჯდომარე, დავით სონღულაშვილი აცხადებს, რომ ევროპარლამენტარებს არჩილ თალაკვაძის ბრიფინგის მოკლე შინაარსი მისწერეს. მისივე თქმით, ეს ჩვეულებრივი კოლეგიალური და სამუშაო პროცესია.

"ამ ნაწილშიც არც საიდუმლო და არც უცნაური არაფერი არაა, როცა ამ ტიპის ინფორმაციას განახლებულად ვაწვდით ხოლმე. ეს არის ურთიერთთანამშრომლობის ჩვეულებრივი პროცესი, ამიტომ ევროპარლამენტარებთან მეილის გაგზავნა არც სასირცხვილო და არც რამე ფარული არაა", — ამბობს სონღულაშვილი.

მისივე თქმით, ევროპარლამენტარებთან კონტაქტი ოპოზიციასაც აქვს, ოღონდ მათგან განსხვავებით ქართული ოცნება ცდილობს, უფრო ობიექტური ინფორმაცია მიაწოდოს.

გამოცემა ტაბულამ დეპუტატ დავით სონღულაშვილის წერილი გაავრცელა. გამოცემის თანახმად, სონღულაშვილი ევროპარლამენტარებს ატყობინებდა, რომ "ენმ, მისი განშტოებები და პრორუსული სატელიტები შეთანხმებაზე მიუთითებენ, როცა საჯაროდ ითხოვენ, ციხიდან გათავისუფლდნენ უგულავა, ოქრუაშვილი და რურუა".

ამასთან, სონღულაშვილი აღნიშნავს, რომ ისინი სთხოვე ელჩებს შეთანხმების შინაარსი გაასაჯაროვონ:

"კერძოდ, ჩვენ ვთხოვთ მათ, საჯაროდ დაადასტურონ, რომ ჩვენ არ გვიკისრია ვალდებულება, უკანონო ინსტრუქციები მიგვეცა პრეზიდენტისთვის, სასამართლოსთვის და პროკურატურისთვის, რათა შეთანხმების ფარგლებში გათავისუფლებულიყვნენ უგულავა, ოქრუაშვილი და რურუა. ჩვენ აგრეთვე ვთხოვთ მათ, უზრუნველყონ ობიექტური შეფასება თითოეული ხელმომწერის როლისა საარჩევნო სისტემაზე შეთანხმების აღსრულების პროცესში".

8 მარტის შეთანხმება: ოპოზიცია VS მთავრობა

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან.

ოპოზიციის საპასუხოდ, პარლამენტის თავმჯდომარე აცხადებს, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. ქართული ოცნების წარმომადგენლები საუბრობენ იმაზეც, რომ ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

დისკუსიას გამოეხმაურნენ საელჩოებიც. მოლაპარაკებებში ჩართული დიპლომატების ერთობლივ განცხადებაში მითითებულია, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, "რაც სასამართლო სისტემაში პოლიტიკურ ჩარევას ჰგავს". საელჩოებმა მოუწოდეს ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს.

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.