ადამიანის უფლებათა სწავლებისა და მონიტორინგის ცენტრი (EMC) თბილისის ღამის კლუბებში ჩატარებული სპეცოპერაციებიდან ორი წლის თავზე აცხადებს, რომ ხელისუფლებამ დანაპირები არ შეასრულა და ამ დრომდე არ გადადგმულა ქმედითი ნაბიჯები ქვეყანაში მოქმედი რეპრესიული ნარკოპოლიტიკის შესაცვლელად.

EMC-ის აცხადებს, რომ დღემდე უპასუხოდ რჩებიან ის ადამიანები, რომლებიც მოქმედი ნარკოპოლიტიკის არაჰუმანურ და უსამართლო სასჯელებს პენიტენციურ დაწესებულებებში ელოდებიან. მათივე ცნობით, მძიმეა ნარკოდანაშაულისთვის მსჯავრდებულ პირთა სოციალური და ეკონომიკური მდგომარეობაც. ორგანიზაციის რეკომენდაციით:

  • ხელისუფლებამ დროულად უნდა განაახლოს მუშაობა ნარკოპოლიტიკის სისტემურ რეფორმაზე;
  • ვინაიდან საპატიმროებში ამ დრომდე რჩებიან მსჯავრდებულები, რომლებიც მცირე ოდენობით ნარკოტიკული საშუალების ფლობისთვის მრავალწლიან სასჯელებს იხდიან, ხელისუფლებამ მეტად აქტიურად უნდა გამოიყენოს შეწყალების და ამნისტიის მექანიზმები.

EMC განცხადებაში უთითებს 2019 წლის ნარკოპოლიტიკის სტატისტიკას:

  • სისხლისსამართლებრივი დევნა დაიწყო 4591 პირის მიმართ;
  • გამამტყუნებელი განაჩენი დადგა 3127 პირის მიმართ, მსჯავრდებულებს ავტომატურად ჩამოერთვათ სამოქალაქო უფლებები;
  • 600 ადამიანი სასჯელს იხდის საპატიმროში;
  • 258 მსჯავრდებულს პირადი მოხმარებისთვის განკუთვნილი ნარკოტიკული ნივთიერების ფლობისთვის 8 წლამდე თავისუფლების აღკვეთა შეეფარდა; (სსკ-ის 260-ე მუხლის პირველი, მე-2, მე-3 ნაწილები)
  • პირობითი მსჯავრის ქვეშ იმყოფება 5000-მდე ადამიანი, რომელთაც შეზღუდული აქვთ დასაქმების, ავტოტრანსპორტის მართვის და სხვა სამოქალაქო უფლებები.

"რეფორმის განუსაზღვრელი ვადით შეჩერების ფონზე, განსაკუთრებით მძიმე იმ ადამიანთა უპასუხოდ დატოვებაა, ვინც ნარკოპოლიტიკის ცვლილებებს სასჯელაღსრულების დაწესებულებებში დღემდე ელოდება", — წერს EMC.