პარტია გირჩის მიერ ორგანიზებულ აქცია-სეირონაბაზე დაკავებულ 3 მოქალაქეზე სასამართლომ გადაწყვეტილება მიიღო. გადაწყვეტილების მიხედვით, სამი დაკავებულიდან ორი 1 000-1 000 ლარით დააჯარიმეს, მესამეს კი შენიშვნა მისცეს.

გირჩი აქციას საგანგებო მდგომარეობის გაუქმების მოთხოვნით იპოდრომზე 23 აპრილს გამართა. ადგილზე შეკრებილები დისტანციის დაცვით სეირნობას აპირებდნენ, თუმცა მალევე პოლიცია გამოჩნდა. შინაგან საქმეთა სამინისტრომ აქციაზე 3 პირი დააკავა და 15 დააჯარიმა. დაჯარიმებულებს შორის იყო გირჩის ლიდერი, ზურაბ ჯაფარიძეც.

დაკავებულების წინააღმდეგ გამოძიება საქართველოს ადმინისტრაციული კოდექსის 166-ე და 173-ე მუხლებით მიმდინარეობდა, რაც წვრილმან ხულიგნობისა და სამართალდამცველების კანონიერი მოთხოვნისადმი დაუმორჩილებლობას გულისხმობს. გირჩის პიარის განცხადებით, სასამართლომ საქმეზე ხულიგნობა არ დაადგინა.