ახალქალაქისა და კუმურდოს ეპარქიის მიტროპოლიტი ფიქრობს, რომ სახელმწიფოსგან საპატრიარქოს 25 მილიონით დაფინანსება "ძალიან ცოტაა" და მისი ეპარქია "ვალებში იხრჩობა". TDI-ს ბოლო ანგარიშის, "რელიგიის თავისუფლება საქართველოში", შესახებ დასმულ კითხვაზე მიტროპოლიტმა TV პირველის კითხვებს უპასუხა:

"ჩვენ გვაქვს ეს თანხა საქართველოს სახელმწიფო რასაც გვიხდის, ესაა კონსტიტუციური შეთანხმების ამოქმედება, ოღონდ 25 მილიონი საქართველოს მართლმადიდებლური ეკლესიისთვის ძალიან ცოტაა, მე მაქვს 500 ათასი ლარი ეპარქიაში სასწავლო ცენტრისთვის და მინდა გითხრათ, რომ ვიხრჩობით ვალებში. [...] ჩემი ავტობომობილის საბაზრო ღირებულება იყო 42 ათასი დოლარი 2006 წელს. პატიოსანმა ადამიანმა რომ ნახა რა მანქანით დავდიოდი ჯავახეთში, ძველით, რაღაც ისეთით, შევეცოდე და შემომწირა. მინდა გითხრათ, 2006-დან დღემდე აბსოლუტურად გავცვითე, ისეთ ადგილებში დავდივარ".

ტოლერანტობის და მრავალფეროვნების ინსტიტუტმა (TDI) ანგარიშში ნათქვამია, რომ 2019-2020 წლებისთვის, წინა წლების მსგავსად, ბიუჯეტში კვლავ 25 მილიონი ლარია გათვალისწინებული საპატრიარქოსთვის. მათი ცნობით, საქართველოს საპატრიარქოს დაფინანსებაში ყველაზე დიდი წილი ცენტრალური ბიუჯეტიდან ყოველწლიურ ტრანსფერზე მოდის:

"2002 წლიდან 2019 წლის ჩათვლით, რელიგიურმა ორგანიზაციამ ცენტრალური სახელმწიფო ბიუჯეტიდან ჯამში 276,5 მილიონი ლარი მიიღო. 2009 წლიდან 2013-მდე ყოველწლიურად გამოყოფილი თანხები 22-დან 27 მილიონამდე მერყეობდა, ხოლო 2013 წლიდან სახელმწიფო ბიუჯეტი საპატრიარქოს დაფინანსებისათვის სტაბილურად 25 მილიონს ითვალისწინებს. 2018 წელს საქართველოს საპატრიარქოს ბიუჯეტიდან გამოეყო 25 535 400 მილიონი ლარი".