პარლამენტის თავმჯდომარიწ, არჩილ თალაკვაძის თქმით, ოპოზიციის "დესტრუქციული" ნაწილი მიხვდა, რომ ორი თვეა პოლიტიკაში მათი ადგილი აღარ არის.

როგორც თალაკვაძე ამბობს, ამის გამო ოპოზიცია მთელი მონდომებით ითხოვს პარლამენტში დაბრუნებას და ბოიკოტის შევწყვეტასაც აპირებს.

"განცდა მიჩნდება, რომ ყოველდღე, ოპოზიციის ეს ნაწილი თათბირობს, დღეს რა გააფუჭოს, დღეს რას ესროლონ ტალახი და როცა მთელი წელი ბოიკოტში იყვნენ, ახლა, პანდემიის დროს ითხოვენ ბოიკოტიდან გამოსვლას და საპარლამენტო პროცესის აღდგენას", — განაცხადა თალაკვაძემ.

საპარლამენტო ოპოზიცია ითხოვს, რომ საკანონმდებლო ორგანომ ჩვეულ რეჟიმში მუშაობა დაიწყოს. ნაციონალური მოძრაობის წევრი, რომან გოცირეძე ამბობს, რომ დღეს, როცა საგანგებო მდგომარეობის პირობებში პარლამენტი განსაკუთრებული დატვირთვით უნდა მუშაობდეს, "ცარიელია და დიდი ბოქლომი ადევს". ნაციონალური მოძრაობა მზადაა, ბოიკოტის რეჟიმიდან დროებით გამოვიდეს.

მმართველი გუნდის წარმომადგენლები აცხადებენ, რომ საგანგებო მდგომარეობის პირობებში საკანონმდებლო პროცესიც კი არ განელებულა. რატი იონათამიშვილის თქმით, პარლამენტი დღეს ძალიან აქტიურად მუშაობს აბსოლუტურად ყველა მიმართულებით და კრიზისების მართვაში ჩართულია.

მამუკა მდინარაძე ამბობს, რომ ოპოზიციას ან არ ესმის საგანგებო სესიების არსი, ან ეს "მორიგი სპეკულაციაა".