საქართველოს ოპოზიციური პარტიების ნაწილი უკრაინის პრეზიდენტს, უმაღლეს რადასა და უკრაინის მოქალაქეებს, ვიცეპრემიერის პოსტზე მიხეილ სააკაშვილის მხარდაჭერისკენ მოუწოდებენ. განცხადებას ხელს აწერენ ერთიანი ნაციონალური მოძრაობა; დამოუკიდებელი დეპუტატი - ნატო ჩხეიძე; ახალი საქართველო; ეროვნულ-დემოკრატიული პარტია; მოძრაობა სახელმწიფო ხალხისთვის — ნიკა მაჭუტაძე; გამარჯვებული საქართველო; კანონი და სამართალი — თაკო ჩარკვიანი; ქრისტიან-კონსერვატიული პარტია — შოთა მალაშხია; ემსახურე საქართველოს — მურმან დუმბაძე.

გავრცელებულ წერილში ნათქვამია, რომ სააკაშვილის მმართველობისას განხორციელებული რეფორმების მსგავსი ხელს შეუწყობს უკრაინის განვითარების დაჩქარებას, რეგიონის წინსვლას და დემოკრატიულ პროგრესს.

წერილში საუბარია საქართველოსა და უკრაინის სტრატეგიულ პარტნიორობასა და საერთო გამოწვევებზე, ასევე, ერთიან საგარეო კურსზე.

"საქართველოს ხელისუფლების ბოლო უპასუხისმგებლო განცხადებები და ქმედებები არის სტრატეგიული პარტნიორის მიმართ უკიდურესად არამეგობრული ნაბიჯი და უკრაინის შიდასახელმწიფოებრივ საკითხებში უაპელაციო ჩარევის მცდელობა, რაც ჩრდილს აყენებს ჩვენი ხალხების მტკიცე მეგობრობას.

ხაზგასმით ვამბობთ, რომ საქართველოს მთავრობის მიერ გამოხატული პოზიცია მოტივირებულია მხოლოდ მათი ვიწრო პოლიტიკურიდა არა სახელმწიფოებრივი ინტერესებით და არასახავს ქართველი ხალხის უდიდესი ნაწილის დამოკიდებულებას უკრაინის მიმართ.

მიხეილ სააკაშვილის წინააღმდეგ წარმოებული სისხლის სამართლის დევნა პოლიტიკურად მოტივირებულია, რაც დადასტურებულია ინტერპოლის გადაწყვეტილებით, სხვა საერთაშორისო ორგანიზაციების ანგარიშებით და დემოკრატიული სახელმწიფოების ლიდერის განცხადებებით. [...] გამოვთქვამთ რწმენას, რომ პრეზიდენტ ზელენსკის გადაწყვეტილებით უკრაინაში რეფორმების განხორციელების მიზნით მიხეილ სააკაშვილის მნიშვნელოვან თანამდებობაზე წარდგენა მხოლოდ დააახლოებს ორ მეგობარ სახელმწიფოს და ახალ იმპულსს შესძენს ჩვენი ხალხების საერთო მცდელობას თავისუფლებისა და შემდგომი განვითარების გზაზე", — ნათქვამია წერილში.

ჯერჯერობით ცნობილი არაა, სააკაშვილის კანდიდატურას რადაში კენჭს როდის უყრიან, სავარაუდოდ ეს ამ კვირაში იქნება. უმაღლესი რადას სპიკერმა, დმიტრი რაზუმკოვმა განაცხადა, რომ დარწმუნებული არაა, რომ სააკაშვილის დანიშვნას მხარს დაუჭერს.

სააკაშვილის ვიცე-პრემიერად დანიშვნის საკითხი, შესაძლოა, საქართველოსა და უკრაინას შორის დიპლომატიური ურთიერთობის გაუარესების მიზეზი გახდეს. ქართული ოცნების წარმომადგენლები პრეზიდენტ ვოლოდიმირ ზელენსკის გადაწყვეტილებას კატეგორიულად მიუღებელს უწოდებენ.

ამავე თემაზე:

• სააკაშვილის შესაძლო დანიშვნა შეარყევს ნდობას ჩვენს სახელმწიფოებს შორის — თალაკვაძის წერილი რადას სპიკერს
• თუ ჩვენ გვექნება დიპლომატიური პრობლემები, საქართველოს უარესი ექნება — რადას დეპუტატი
• პოროშენკოსგან განსხვავებით ზელენსკისთან კონფლიქტი არ მექნება, რადგან ქურდი არ არის — სააკაშვილი