მსოფლიო ჯანდაცვის ორგანიზაცია (WHO) მოსახლეობას აფრთხილებს, რომ კორონავირუსისგან გამოჯანმრთელებული ადამიანები შესაძლოა ვირუსით ხელახლა დაინფიცირდნენ. განცხადებას ამის შესახებ CNN ავრცელებს.

WHO-ს მიერ პარასკევს გამოქვეყნებულ დოკუმენტში წერა, რომ ამ დროისთვის არ არსებობს მტკიცებულებები, რომ კორონავირუსისგან გამოჯანმრთელებულები ხელახლა არ დაინფიცირდებიან. მათი თქმით, არ არსებობს მტკიცებულება, რომ სისხლში არსებული ანტისხეულები, განმეორებით ინფიცირებისგან სრულად იცავენ.

ჯანდაცვის ორგანიზაცია ამ განცხადებით იმ სახელმწიფოების საყურადღებოდაც აკეთებს, რომლებმაც თქვეს, რომ გამოჯანმრთელებულ ადამიანებს "იმუნიტეტის პასპორტს" და "რისკისგან თავისუფალ სერტიფიკატის" მისცემენ. ეს დოკუმენტი იმის დამადასტურებელი იქნება, რომ მფლობელს შეუძლია ჩვეულებრივი ცხოვრება გააგრძელოს.

ამერიკის ინფექციური დაავადებების ასოციაციის (IDSA) სპიკერმა, მერი ჰაიდენმა პარასკევს ბრიფინგზე განაცხადა, რომ არ იციან ანტისხეულები რა დონის დაცვას უზრუნველყოფს, ეს შეიძლება იყოს სრულყოფილი ან ნაწილობრივი. ექიმმა აღნიშნა, რომ ანტისხეულების რეაქციები დროთა განმავლობაში მცირდება.

"ჩვენ არ ვიცით, არიან თუ არა პაციენტები, რომლებსაც აქვთ ეს ანტისხეულები, Covid-19–ით ხელახლა დაინფიცირების რისკის ქვეშ. ამ ეტაპზე, ვფიქრობ, უნდა ვივარაუდოთ, რომ ისინი შესაძლოა განმეორების რისკის ქვეშ აღმოჩნდნენ", — თქვა მერი ჰაიდენმა.

ექიმმა საზოგადოებას ურჩია, რომ იმ ადამიანებმაც, ვინც ვირუსი გადაიტანეს და სისხლში ანტისხეულები აქვთ, გააგრძელონ სოციალური დისტანცირებისა და სხვა რეკომენდაციების დაცვა.

ჯონ ჰოპკინსის უნივერსიტეტის მონაცემების თანახმად, მსოფლიოში კორონავირუსით 2 865 938 ადამიანი დაინფიცირდა, 200 698 გარდაიცვალა, ხოლო 810 327 გამოჯანმრთელდა.

ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად 11 მარტს გამოაცხადა.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ: