მოქალაქე მიშა კაჭკაშვილი ამბობს, რომ მომაკვდავი ლეკვის ვეტერინართან მანქანით მიყვანისას, 3 000 ლარით დააჯარიმეს. როგორც ის სოციალურ ქსელში წერს, სახლიდან გასვლამე სცადა მთავრობის ცხელ ხაზზე დარეკვა და მანქანის სამართავად ნებართვის მიღება, თუმცა ხარვეზის გამო ეს ვერ შეძლო.

On.ge-სთან საუბრისას ის ამბობს, რომ სამართალდამცავებმა ვეტკლინიკიდან წამოსვლის შემდეგ დააჯარიმეს, როდესაც მას თან ჰქონდა დანიშნულება იმის დასამტკიცებლად, რომ ექიმთან იყო. გარდა ამისა, მისი თქმით, სამართალმდაცავებს აჩვენა ფოტოები იმის დასტურად, რომ 144-ზე დარეკვა არაერთხელ სცადა და მათ თვალწინაც კი უშედეგოდ სცადა დაკავშირება, თუმცა პასუხად მიიღო: "ეს ჩვენ არ გვეხება".

ფოტო: მიშა კაჭკაჭიშვილი

კაჭკაჭიშვილის საჯარიმო ქვითარზე წერია, რომ საგანგებო მდგომარეობის წესების დარღვევის გამო დაჯარიმდა. შინაგან საქმეთა სამინისტროში On.ge-ს განუცხადეს, რომ პერსონალურ ინფორმაციას ვერ გასცემენ, ამიტომ ამ საკითხზე დამატებითი დეტალებზე ვერ ისაუბრებენ.

საგანგებო მდგომარეობის ფარგლებში 27 აპრილამდე ქვეყანაში აკრძალულია მსუბუქი ავტომობილებით გადაადგილება. თუმცა შეზღუდვებში გათვალისწინებიულია გადაუდებელი სამედიცინო საჭიროების აუცილებლობისას მანქანის გამოყენება.

On.ge ცდილობს გაარკვიოს, რატომ არ აძლევენ სამართალდამცავები მოქალაქეებს უფლებას გადაუდებელი სამედიცინო საჭიროებისას შინაური ცხოველებისთვისაც ისარგებლონ მანქანით, თუმცა მთავრობის ცხელ ხაზზე დაკავშირება ამ დრომდე ვერ ხერხდება. რა გახდა ტექნიკური ხარვეზის მიზეზი და როდის აღდგება ცხელი ხაზის მუშაობა ამ კითხვით პრესსამსახურს მივმართეთ, მათ პასუხს მიღებისთანავე შემოგთავაზებთ.